عمران نے چوری چھپانے کیلیے القادر ٹرسٹ بنایا‘ طلال چودھری

فیصل آباد (نمائندہ جسارت) ن لیگی رہنما طلال چودھری نے کہا ہے کہ عمران خان نے چوری چھپانے کے لیے القادر ٹرسٹ بنایا۔ ان خیالات کا اظہار انہوں نے اسلام آباد میں میڈیا سے گفتگو کرتے ہوئے کیا۔ ان کا کہنا تھا کہ القادر ٹرسٹ کیس کا فیصلہ آنے والا ہے، برطانوی ایجنسی نے190 ملین پاؤنڈ کیس کی انکوائری کی جو پیسے خزانے میں آنے تھے وہ
کاروباری شخصیت کی جیب میں ڈال دیے گئے، بند لفافے میں معاہدہ کابینہ کے سامنے پیش کیا گیا۔ برطانیہ میں پس پردہ شہزاد اکبر نے کاروباری شخصیت سے ملاقات کی، عمران خان اس سارے معاملے میں ملوث تھے، 190 ملین پاؤنڈ کے بدلے زمین حاصل کی گئی، 190 ملین پاؤنڈ کی چوری کو چھپانے کے لیے القادر ٹرسٹ بنایا گیا۔ طلال چودھری نے مزید کہا کہ پی ٹی آئی دور میں بنی گالہ منی گالہ بن گیا تھا، لین دین ہوتا رہا، بشریٰ بی بی لین دین اور کمیشن لیتی تھیں۔