کراچی(اسپورٹس ڈیسک)ریجنل کرکٹ ایسوسی ایشن کراچی زون تین کے زیر انتظام عبدالحمید کھتری میموریل ٹی20کرکٹ ٹورنامنٹ میں محمد حسین جیم خانہ نے بن یامین کی تباہ کن بولنگ کی بدولت شاہین جم خانہ کو84رنز سے شکست دے کر مسلسل دوسری کامیابی حاصل کر لی بنیامین نے صرف19گیندوں پر چار وکٹیں لے کر میچ یکطرفہ کر ڈالا ۔دوسرے میچ میں بقائی ڈولفنز نے دہلی بوائز کو آٹھ وکٹوں سے قابو کیا۔آصف آباد گرائونڈ پر کھیلے گئے اس میچ میں محمد حسین کلبنے پہلے کھیلتے ہوئے 9وکٹوں کے نقصان پر207رنز اسکور کیے ،اس کی جانب سے مرسلین نے پانچ چوکوں اور سات چھکوں کی مدد سے 36گیندوں پر72،نور النبی نے 23 اور راشد اشرف نے22رنز بنائے ۔جواد احمد اور ابو بکر نے 3،3 جبکہ ذرک خان اور رانا مدثر نے ایک ایک وکٹ حاصل کی ۔جواب میں شاہین جم خانہ کی ٹیم 16.4اوورز میں 123رنز پر آئوٹ ہو گئی ۔ فضل خان30اور جواد احمد23رنز کے ساتھ نمایاں اسکورر رہے ،فاتح ٹیم کی جانب سے بنیامین نے تباہ کن بولنگ کرتے ہوئے 1.4اوورز میں 9رنز کے عوض چار وکٹیں حاصل کیں ۔نور بنی نے دوجبکہ عبدالرحمان ،مرسلین ،رمضان اور فرمان نے ایک ایک کھلاڑی کو آئوٹ کیا َ۔دوسرے میچ میں دہلی بوائز نے پہلے کھیلتے ہوئے پانچ وکٹوں پر 130رنز بنائے ۔ نعمان علی نے چار چوکوں کی مدد سے45،سنی نذیر نے32اور ایم مسنا نے23رنز بنائے ۔محمد نے دو جبکہ اصغر علی ،ارشد خان اور عبید اللہ نے ایک ایک وکٹ حاصل کی ،جواب میں بقائی نے دو وکٹوں پر اسکور پورا کر لیا ،اس کی جانب سے عبید اللہ نے آٹھ چوکوں اور تین چھکوں کی مدد سے 57اور فہد انصاری نے پانچ چوکوں اور دو چھکوں کی مدد سے 37رنز اسکور کیے۔
