ملٹری ٹرائل کا عدالتی حکم ملکی جگ ہنسائی کا باعث بنے گا‘ اسد قیصر

اسلام آباد (آن لائن) تحریک انصاف کے سینئر رہنما اور سابق اسپیکر قومی اسمبلی اسد قیصر نے کہا ہے کہ اگر ملٹری ٹرائل کا عدالت سے حکم ملتا ہے تو یہ بڑا ظلم ہوگا، یہ پاکستان کی جگ ہنسائی کا باعث بن جائے گا۔ پارلیمنٹ ہاؤس کے باہر میڈیا سے گفتگو کرتے ہوئے انہوں نے کہا کہ2 ایشوز پر بات کرنا چاہتے ہیں، ملٹری ٹرائل کا کیس عدالت عظمیٰ میں چل رہا ہے، فل کورٹ اس کیس کو دیکھ رہی ہے، ملٹری کورٹ کے ذریعے ہمارے کارکنان کو سزا دی گئی، عوام کا ملٹری ٹرائل
کیسے ہو سکتا ہے۔ انہوں نے کہا کہ ہمیں امید ہے عدالت عظمیٰ سے انصاف ملے گا، عمران خان پر 200 سے زائد کیسز بنائے گئے ہیں، ہمارے آئینی اور قانونی حقوق کو مجروح کیا جا رہا ہے،پاکستان میں آئین و قانون کی دھجیاں اُڑائی جارہی ہیں، مذاکراتی کمیٹیوں کے اجلاس میں ہم نے سنجیدگی کا مظاہرہ کیا، ہم نے مذاکراتی اجلاس میں مطالبہ کیا تھا کہ عمران خان سے ملاقات کا سلسلہ جاری رہنا چاہیے مگر تاحال ملاقات نہیں کرائی گئی۔