کراچی: دنیا کے امیر ترین شخص ایلون مسک کی سیٹیلائٹ انٹرنیٹ سروس فراہم کرنے والی کمپنی ’ سٹارلنک‘ پاکستان میں رجسٹرڈ ہو گئی ہے لیکن اس کے انٹرنیٹ پیکج کی قیمت جان کر آپ کے یقینی طور پر ہوش اُڑ جائیں گے ۔
تفصیلات کے مطابق ’اسٹار لنک‘ روایتی انٹرنیٹ سروسز فراہم کرنے والی کمپنیوں سے بالکل مختلف ہے، روایتی کمپنیاں تار کے ذریعے انٹرنیٹ کی سہولیات فراہم کرتی ہیں جب کہ مذکورہ کمپنی خلائی سیٹلائٹ کے ذریعے انٹرنیٹ سروس فراہم کرتی ہے۔
کمپنی کا دعویٰ ہے کہ اسٹار لنک کا سیٹلائٹ انٹرنیٹ سمندر کی تہہ سے جنگل تک، پہاڑوں سے لے کر غاروں تک اور یہاں تک کہ فضائی سفر کے دوران بھی استعمال کیا جاسکتا ہے۔
اسٹارلنک کے پاکستان آنے کا ایک اور فائدہ یہ بھی ہوگا کہ اب ملک کے جن دور دراز علاقوں میں انٹرنیٹ اور موبائل سروسز دستیاب نہیں ہیں، وہاں کے عوام بھی تیز رفتار انٹرنیٹ استعمال کرنے کے قابل ہوجائیں گے۔تاحال پاکستان میں اسٹارلنک کی انٹرنیٹ سروس کو باضابطہ طور پر لانچ نہیں کیا گیا ہے اور رجسٹریشن کے بعد بھی اسے مزید چند مراحل سے گزرنا ہے۔
اسٹار لنک انٹرنیٹ گھریلو پیکج کے ماہانہ چارجز تقریبا 35 ہزار پاکستانی روپے ہوں گے جس کے بدلے صارفین 50 Mbps سے 250 Mbps انٹرنیٹ اسپیڈ سے لطف اندوز ہوسکیں گے جبکہ اس پیکج کے ساتھ ڈیوائس کی قیمت ایک لاکھ 10 ہزار روپے ہوگی جو صرف ایک بار ادا کرنی ہوگی۔
جبکہ بزنس پیکج کے ماہانہ چارجز 95 ہزار پاکستانی روپے ہوں گے جس کے بدلے صارفین 100 Mbps سے 500 Mbps انٹرنیٹ اسپیڈ سے لطف اندوز ہوسکیں گے جبکہ اس پیکج کے ساتھ ڈیوائس کی قیمت 2 لاکھ 20 ہزار روپے ہوگی جو صرف ایک بار ادا کرنی ہوگی۔
موبلٹی پیکج کے ماہانہ چارجز لگ بھگ 50 ہزار پاکستانی روپے ہوں گے جس کے بدلے صارفین 50 Mbps سے 250 Mbps انٹرنیٹ اسپیڈ سے لطف اندوز ہوسکیں گے جبکہ اس پیکج کے ساتھ ڈیوائس کی قیمت 1 لاکھ 20 ہزار روپے ہوگی جو صرف ایک بار ادا کرنی ہوگی۔
