غزہ (صباح نیوز) غزہ میں ہونے والی جھڑپوں میں اسرائیلی فوج کا میجر اور کیپٹن ہلاک اور4 سپاہی شدید زخمی ہوگئے۔ غزہ میں حماس کی اسرائیلی فوج کی چھاپہ مار ٹیم کے ساتھ گھمسان کی جنگ ہوئی ہے۔عالمی خبر رساں ادارے کے مطابق یہ تازہ جھڑپ غزہ کے علاقے بیت حنون میں ہوئی جس میں اسرائیلی فوج کا میجر اور کیپٹن ہلاک ہوگیا۔ اسرائیلی میڈیا کے مطابق غزہ میں گزشتہ روز فلسطینی مزاحمت کاروں کے حملے میں 24 سالہ کیپٹن شخنازی اور 28 سالہ میجر ریواہ مارے گئے ہیں، اسرائیلی دفاعی افواج کا کہنا ہے کہ لڑائی کے دوران 4 سپاہی زخمی بھی ہوئے، اسرائیلی فوج کے مطابق ہلاک ہونے والے فوجی افسروں کا تعلق نہال بریگیڈ 932 بٹالین سے تھا۔ اسرائیلی فوج نے اپنے زخمی اہلکاروں کی شناخت ظاہر نہیں کی۔ زخمی سپاہیوں کی حالت نازک ہونے کے باعث ہلاکتوں میں اضافے کا خدشہ ہے۔اسرائیلی فوج کے 2 اہلکاروں کی ہلاکت کے بعد گزشتہ ایک برس میں ہلاک ہونے والے اسرائیلی فوجیوں کی تعداد 500سے زاید ہوگئی۔حماس کے7 اکتوبر 2023 کو اسرائیل پر کیے گئے حملے میں ہلاک ہونے والے ایک ہزار فوجی اس کے علاوہ ہیں۔ غزہ جنگ کے دوران اب تک اسرائیلی پولیس کے 69 اہلکار بھی مارے گئے۔
