کیپ ٹاؤن: کیپ ٹاؤن ٹیسٹ کے پہلے روز کے اختتام پر جنوبی افریقہ نے پاکستان کیخلاف 4 وکٹوں کے نقصان پر 316 رنز بنا لیے ہیں۔
کیپ ٹاؤن میں کھیلے جارہے سیریز کے دوسرے ٹیسٹ میچ میں جنوبی افریقی اوپنرز نے پہلی وکٹ کی شراکت میں ٹیم کو 61 رنز کا جارحانہ آغاز فراہم کیا تاہم ایڈن مارکرم 17 رنز کے مہمان ثابت ہوئے، بعدازاں ویان مولڈر 5 اور ٹرسٹن اسٹبس صفر پر پویلین لوٹ گئے۔
جنوبی افریقا کے اوپنر بلے باز ریان رکیلٹن اور کپتان ٹیمبا باوما نے شاندار کھیل کا مظاہرہ کیا اور ٹیم کے مجموعی سکور کو پر لگا دیئے، کپتان ٹیمبا باوما 106 رنز بنا کر آؤٹ ہوئے جبکہ اوپنر ریان رکیلٹن 176 رنز کیساتھ کریز پر موجود ہیں۔
دونوں ٹیموں کے درمیان 2 ٹیسٹ میچز پر مشتمل سیریز کا دوسرا اور آخری ٹیسٹ میچ کیپ ٹاؤن کے نیو لینڈ کرکٹ اسٹیڈیم میں کھیلا جا رہا ہے، میزبان ٹیم جنوبی افریقہ کو سیریز میں ایک صفر کی برتری حاصل ہے۔
دوسرے ٹیسٹ کیلئے قومی ٹیم میں ایک تبدیلی کی گئی ہے، فاسٹ باؤلر نسیم شاہ کو ڈراپ کر کے بائیں ہاتھ کے تیز گیند باز میر حمزہ کو سکواڈ کا حصہ بنایا گیا ہے۔پاکستانی ٹیم کپتان شان مسعود، صائم ایوب، بابر اعظم، کامران غلام، وکٹ کیپر بلے باز محمد رضوان، سعود شکیل، سلمان علی آغا، عامر جمال، خرم شہزاد، میر حمزہ اور محمد عباس پر مشتمل ہے۔
