کراچی(کامرس رپورٹر)پاکستان کا تجارتی خسارہ دسمبر 2024 میں 35 فیصد بڑھ کر 1.8 ارب ڈالر تک پہنچ گیا، جب کہ درآمدات دو سال میں پہلی بار 5 ارب ڈالر سے زیادہ ہوگئیں۔ قومی ادارہ شماریات کے مطابق تجارتی خسارہ پچھلے سال کے اسی ماہ کے مقابلے میں دسمبر میں 35 فیصد بڑھ گیا، خسارے میں اضافے کی بنیادی وجہ 5.3 ارب ڈالر مالیت کی درآمدات تھیں جو دسمبر 2022 کے بعد سب سے زیادہ رہیں، یہ پہلا موقع تھا کہ دو سال میں حکام نے درآمدات کو 5 ارب ڈالر سے تجاوز کرنے کی اجازت دی۔ پچھلے ماہ درآمدات میں 650 ملین ڈالر یا 14 فیصد کا اضافہ ہوا۔گزشتہ تقریباً تین سال سے بیرونی سیکٹر کے چیلنجز کی وجہ سے درآمدات پر غیر رسمی پابندیاں عائد ہیں۔ حکومت نے محدود درآمدات اور غیر قرضہ جاتی رسمی آمدنی میں کچھ اضافے کے ذریعے کرنٹ اکاؤنٹ خسارے کو کنٹرول میں رکھا ہے۔ درآمدات کو غیر ملکی زر مبادلہ کی کم دستیابی اور مرکزی بینک کی ذخائر بڑھانے کی پالیسی کے تحتماہانہ 4.5 ارب ڈالر تک محدود رکھا گیا ہے۔دسمبر میں برآمدات 2.8 ارب ڈالر سے زیادہ رہیں اور ان میں اضافہ جاری رہا، لیکن پچھلے سال کی بنیاد پر یہ اضافہ سست رہا۔موجودہ مالی سال کے دوران برآمدات اور بیرون ملک مقیم پاکستانیوں کی ترسیلات زر میں صحت مند رفتار دیکھی گئی ہے – یہ دو اہم غیر قرضہ جاتی ذرائع ہیں۔ اس سے حکومت کو کم از کم 600 ملین ڈالر ماہانہ کی اضافی مدد ملتی ہے۔لیکن یہ سب روپے کی قیمت کو 278 روپے فی ڈالر پر رکھنے کے ذریعے حاصل کیا گیا ہے ۔موجودہ مالی سال کی پہلی ششماہی (جولائی تا دسمبر) کے دوران درآمدات میں 6 فیصد یا 1.6 ارب ڈالر کا اضافہ ہوا۔ چھ ماہ میں درآمدات 27.7 ارب ڈالر رہیں۔اس کے مقابلے میں، چھ ماہ کی برآمدات 16.6 ارب ڈالر تک پہنچ گئیں، جس میں 1.6 ارب ڈالر یا 10.5 فیصد کا اضافہ ہوا۔ پچھلے مالی سال میں چاول کی برآمدات نے پاکستان کی کل برآمدات میں نمایاں حصہ ڈالا تھا۔ لیکن بھارت نے اب اپنی چاول کی برآمدات پر عائد پابندی ختم کر دی ہے۔ پہلی ششماہی میں تجارتی خسارہ 11.2 ارب ڈالر پر قابل انتظام رہا۔ ماہانہ بنیادوں پر، ادارہ شماریات کے اعداد و شمار کے مطابق دسمبر میں تجارتی خسارہ 47 فیصد بڑھ کر 2.4 ارب ڈالر ہوگیا۔پچھلے ماہ برآمدات 2.8 ارب ڈالر رہیں، جو 8 ملین ڈالر زیادہ تھیں۔ لیکن درآمدات 5.3 ارب ڈالر تک پہنچ گئیں، جس میں 17.5 فیصد کا اضافہ ہوا۔
