کراچی(اسپورٹس ڈیسک)سیالکوٹ اور پشاور کی ٹیمیں کل سے پاکستان کرکٹ کے سب سے بڑے فرسٹ کلاس ٹورنامنٹ قائداعظم ٹرافی کے 68 ویں ایڈیشن کے فائنل میں مدمقابل ہونے والی ہیں۔ فاتح ٹیم کو 75 لاکھ روپے کی انعامی رقم ملے جبکہ رنراپ ٹیم کو40 لاکھ روپے ملیں گے۔ پانچ روزہ فائنل یوبی ایل اسپورٹس کمپلیکس کراچی میں کھیلا جائے گا۔سیالکوٹ پشاور اور لاہور وائٹس کی ٹیمیں اپنے اپنے گروپ میں سرفہرست رہنے کی وجہ سے سہ فریقی مرحلے میں پہنچی تھیں جہاں سیالکوٹ نے دو میں سے ایک میچ جیتا ایک ڈرا ہوا اور اس نے سب سے زیادہ 36 پوائنٹس حاصل کیے۔ پشاور نے دو میں سے ایک میچ جیتا اور ایک میں اسے شکست ہوئی اس طرح وہ 25 پوائنٹس کے ساتھ دوسرے نمبر پر رہی۔لاہور وائٹس کی ٹیم ایک میچ ڈرا اور ایک شکست کے سبب13 پوائنٹس حاصل کرسکی۔ اس طرح سیالکوٹ اور پشاور نے فائنل کے لیے کوالیفائی کرلیا۔ سیالکوٹ اور پشاور دونوں ٹیمیں گروپ مرحلے میں ناقابل شکست رہی تھیں۔ دونوں نے پانچ میں سے تین میچز جیتے تھے جبکہ دو ڈرا ہوئے تھے۔ سیالکوٹ کو بیٹنگ میں اذان اویس،محسن ریاض اور عاشر محمود کی خدمات حاصل ہیں جو اس ٹورنامنٹ میں اچھی فارم میں ہیں۔ اذان اویس ابتک 4 سنچریوں اور 2 نصف سنچریوں کی مدد سے 807 رنز بناکر اس ٹورنامنٹ کے سب سے کامیاب بیٹر ہیں۔ قابل ذکر بات یہ ہے کہ اذان اویس نے اسی ٹورنامنٹ میں اپنے فرسٹ کلاس کریئر کا آغاز کیا ہے۔ محسن ریاض ایک سنچری اور 3 نصف سنچریوں کی مدد سے512 رنز بناچکے ہیں جبکہ عاشر محمود نے 2 سنچریوں اور 2 نصف سنچریوں کی مدد سے 494 رنز اسکور کیے ہیں۔
