اٹک/ وزیرآباد(خبرایجنسیاں) اٹک، نوشہرو فیروز اور وزیر آباد میں ٹریفک حادثات کے دوران 21 افراد جاں بحق جبکہ 24 زخمی ہوگئے۔ریسکیو حکام کے مطابق میانوالی سے راولپنڈی جانے والی بس فتح جنگ انٹرچینج کے قریب الٹ گئی جس کے نتیجے میں میں 12 افراد زندگی کی بازی ہار گئے جبکہ 15 افراد زخمی ہوئے ہیں۔حکام کا کہنا ہے کہ ٹائر پھٹنے کی وجہ سے ڈرائیور بس پر کنٹرول نہ کر سکا اور حادثہ پیش آیا، حادثے کے زخمیوں کو اسپتال منتقل کر دیا گیا ہے۔دوسری جانب نوشہرو فیروز میں ٹرالر اور وین میں تصادم سے 6 افراد جاں بحق ہوگئے۔ پولیس حکام کے مطابق سندھ کے شہر نوشہرو فیروز میں مورو کے قریب ٹریفک حادثہ پیش آیا جس میں 6افراد جان سے چلے گئے جب کہ 9 زخمی ہوئے ہیں، نعشوں اور زخمیوں کو طبی امداد کے لیے اسپتال منتقل کیا گیا ہے۔حکام کا کہنا ہے کہ تمام تر افراد کا تعلق تگر برادری سے ہے، حادثے کا شکار وین شادی کی تقریب سے واپس آ رہی تھی کہ حادثہ پیش آیا۔علاوہ ازیں وزیر آباد میں ٹریکٹر ٹرالی نے موٹر سائیکل کو ٹکر مار دی جس کے نتیجے میں 3 افراد جاں بحق ہوگئے جبکہ ایک زخمی ہے، جنہیں اسپتال منتقل کر دیا گیا ہے۔وزیر اعلیٰ پنجاب مریم نواز نے ٹریفک حادثات میں قیمتی انسانی جانوں کے ضیاع پر گہرے دکھ و رنج کا اظہار کیا ہے۔مریم نواز نے سوگوار خاندانوں سے اظہار ہمدردی و تعزیت جب کہ زخمیوں کی جلد صحت یابی کے لیے دعا کی اور زخمیوں کو بہترین طبی سہولتیں فراہم کرنے کی ہدایت کی ہے۔
