جرمنی (کامرس ڈیسک)دنیا کی سب سے بڑی ٹیکسٹائل اورکارپٹس نمائش” ہیم ٹیکسٹائل 2025 “میںپاکستان نئی تاریخ رقم کرنے جا رہا ہے۔دنیا کا سب سے بڑا تجارتی میلہ 14 تا 17 جنوری کو فرینکفرٹ میں ہوگا جوانٹیریئرٹیکسٹائل اور ڈیزائن کے شعبے سے متعلق ہے ۔ ہیم ٹیکسٹائل نمائش میں 270 سے زائد نمائش کنندگان کے ساتھ پاکستان کی سب سے بڑی شرکت ہے – پاکستان اپنی غیر معمولی ٹیکسٹائل مہارت کو دنیا کے سامنے پیش کرنے کے لیے تیار ہے اور عالمی مارکیٹ میں اپنی پوزیشن کو مستحکم کرے گا۔ نئے نمائش کنندگان میں 10فیصد کے شاندار اضافے کے ساتھ، پاکستان اب چین، ہندوستان اور ترکی کے بعد چوتھے نمبر پر آ گیا ہے۔ یہ کامیابی پاکستانی نمائش کنندگان کو ہال نمبر 8 اور 9 میں منتقل کرنے کی بدولت ممکن ہوئی۔ٹیکسٹائل کے بڑھتے ہوئے مفاد کے پیش نظر، نئے قالین کے ہال میں اضافی جگہ مختص کی گئی ہے، جس میں پہلے ہی بیلجیم، ترکی اور ہندوستان کے نمائش کنندگان موجود ہیں، اس سے پاکستانی کمپنیوں کے لیے مزید مواقع بڑھ سکتے ہیں۔ یہ توسیع پاکستان کی ٹیکسٹائل انڈسٹری کو اپنی منفرد دستکاری اور جدید قالین ڈیزائن پیش کرنے کے قابل بنائے گی، جس سے عالمی مارکیٹ میں اس کا اثر مزید بڑھ سکتا ہے۔
