مسلم لیگ ن کے رہنما سعد رفیق نےکہا ہےکہ نو منتخب امریکی صدر ڈونلڈ ٹرمپ کے نمائندہ خصوصی رچرڈ گرینل کا ضمیر اچانک جاگ گیا ہے، فلسطینیوں کی نسل کشی پر رچرڈ گرینل کا مردہ ضمیر آج بھی غاصب صیہونیوں کے ساتھ ہے۔
سعد رفیق نے اپنے ایک بیان میں رچرڈ گرینل کے بیان پر ردعمل دیتے ہوئے کہا کہ رچرڈ گرینل کا ضمیر 2018 کے الیکشن چوری سے سیاسی انتقام کے سیاہ دور تک سو رہا تھا، رچرڈ گرینل کا ضمیر اپوزیشن لیڈروں کی طویل قید پر سو رہا تھا۔
لیگی رہنما کا کہنا تھا کہ فلسطینیوں کی نسل کشی پر رچرڈ گرینل کامردہ ضمیر آج بھی غاصب صیہونیوں کے ساتھ ہے، رچرڈ گرینل جیسے بے ضمیر لوگوں کا شعور صرف سامراجی عزائم کی تکمیل کے لیے ہی جاگتا ہے، رچرڈ گرینل جیسے لوگوں کا انسانیت، انصاف، جمہوریت اور قانون کی حکمرانی سے کوئی تعلق نہیں۔
رہنما ن لیگ کا کہنا تھا کہ رچرڈ گرینل جیسے لوگوں کا مطالبہ کچھ اور مقاصد کچھ اور ہوتے ہیں، پاکستان کو بخوبی علم ہے یہ سب مل کر چین بلاک کو توڑنےکی کوشش کریں گے، پاکستان کو بخوبی علم ہےکہ یہ ایران کو گھیرنے کے لیے پاکستان پر دباؤ ڈالنےکی کوشش کریں گے۔
سعد رفیق کا مزید کہنا تھا کہ رچرڈ گرینل جیسے لوگوں نے پہلے بھی ایسا کیا لیکن مالک کائنات نے پاکستان کو محفوظ اور مضبوط رکھا۔
