لاہور (آئی این پی) پنجاب کے مختلف علاقوں میں شدید دھند کے باعث موٹر وے کو متعدد مقامات پر بند کر دیا گیا ہے، موٹر وے پولیس نے عوام سے حفاظتی تدابیر اختیار کرنے کی ہدایت کی ہے۔ ترجمان موٹر وے پولیس کا کہنا ہے کہ موٹر وے ایم 2 ٹھوکر نیاز بیگ سے بابو صابو تک دھند کی وجہ سے بند کر دی گئی ہے، جبکہ موٹر وے ایم 3 سمندری سے درخانہ تک دھند کے باعث بند ہے۔ ترجمان کے مطابق موٹر وے ایم 4 کو شورکوٹ سے گوجرہ تک دھند کے باعث بند کردیا گیا ہے۔ ترجمان موٹروے پولیس کے مطابق پنجاب میں موٹر ویز بند کرنے کا مقصد حادثات سے بچائو اور موٹر وے استعمال کرنے والوں کے جان و مال کا تحفظ ہے۔ شہریوں سے درخواست ہے کہ دھند کے اوقات میں غیر ضروری سفر سے گریز کریں، اپنا سفر دن کی روشنی میں مکمل کر کے دھند کے آغاز سے پہلے اپنے منزل تک پہنچ جائیں، گاڑیوں میں فوگ لائٹس کا استعمال، تیز رفتاری سے گریز کریں اور اگلی گاڑی سے مناسب فاصلہ معمول سے زیادہ رکھیں۔ ترجمان موٹر وے پولیس نے کہا کہ سفر شروع کرنے سے پہلے موٹر وے پولیس ہیلپ لائن 130 یا نیشنل ہائی ویز اینڈ موٹر وے پولیس کے آفیشل سوشل میڈیا اکائونٹ سے بھی تازہ ترین معلومات ضرور حاصل کر لیں۔
