راولپنڈی: انسداد دہشتگردی عدالت نے جنرل ہیڈ کوارٹر ( جی ایچ کیو ) حملہ کیس میں پاکستان تحریک انصاف کے رہنما عمر ایوب کی درخواست بریت خارج کردی۔
پاکستان تحریک انصاف کے رہنما اور قومی اسمبلی میں اپوزیشن لیڈر عمر ایوب کے خلاف جنرل ہیڈ کوارٹر ( جی ایچ کیو ) حملہ کیس میں سماعت راولپنڈی کی انسداد دہشتگردی عدالت کے جج امجد علی شاہ نے کی۔
سماعت کے دوران عدالت نے ریمارکس دیے کہ ابھی مقدمہ ابتدائی مرحلے میں ہے اس لیے بریت کی درخواست قبل از وقت ہے ۔
اس موقع پر پبلک پراسیکیوٹر ظہیر شاہ نے کہا کہ ملزم ہمراہی ملزمان کے اقبالی بیان میں نامزد ہے، فرد جرم سے قبل ملزم کی بریت استغاثہ کی شہادت کو متاثر کرسکتی ہے۔
انسداد دہشتگردی عدالت نے عمر ایوب کی درخواست پر محفوظ فیصلہ سنایا اور ان کی بریت کی درخواست خارج کردی۔
