ابوظہبی (اسپورٹس ڈیسک )ابو ظہبی میں ٹی 10 لیگ میں بولر بلے بازکے سامنے بوکھلا گیا ، اوور کی پہلی 3 گیندوں پر 30 رنز دے ڈالے ۔ گزشتہ دنوں دہلی بلز کی بیٹنگ کے دوران بنگلا ٹائیگرز کی جانب سے سری لنکا کے سابق کپتان داسن شناکا 9 واں اوور کروانے آئے اور ابتدائی 3 گیندوں پر 10 یا 20 نہیں بلکہ پورے 30 رنز دے ڈالے۔ اوور کی پہلی گیند پر بلے باز نکھل چودھری نے شناکا کو چوکا لگایا، اس کے بعد اگلی گیند نوبال ہوئی اور اس پر بھی چوکا لگا۔یہ معاملہ یہیں نہیں رکا، شناکا نے اگلی گیند پھر نوبال کروائی اور نتیجہ وہی، بلے بازنے چوکامار دیا۔ابھی صرف اوور کی ایک گیند ہوئی اور انہوں نے 14 رنز دے دیئے۔ شناکا پھر دوڑے اور گیند کروائی جس پر ایک اور چوکا لگا، اوور کی تیسری گیند پر بلے باز نے چھکا مار دیا، پھر اگلی گیند ایک مرتبہ پھر نوبال ہوئی پر خوش قسمتی سے کوئی بائونڈری نہیں لگی، لیکن یہ معاملہ رکا نہیں۔شناکا کی اگلی گیند پھر نوبال ہوئی اور ساتھ چوکا بھی لگ گیا، یوں اوور کی 3 لیگل گیندوں پر انہوں نے مجموعی طور پر 30رنز دے دئیے۔ البتہ اوور کی اگلی 3 گیندوں پر صرف 3 رنز بنے اور شناکا کے اوور میں مجموعی طور پر 33 رنز آئے۔
