اسلام آباد: ذرائع کے مطابق انٹرنیشنل کرکٹ کونسل کا اجلاس جو 2025 کی چیمپئنز ٹرافی کے حوالے سے آج طے تھا، اب ملتوی کر دیا گیا ہے۔ آئی سی سی کی مشاورت جاری ہے اور اجلاس اتوار یا پیر کو ہونے کا امکان ہے۔
پاکستان کرکٹ بورڈ اور بورڈ آف کنٹرول فار کرکٹ انڈیا نے آئی سی سی سے درخواست کی ہے کہ وہ اپنے متعلقہ وزارتوں سے اس معاملے پر مشاورت کے لیے وقت دے۔ گزشتہ روز، آئی سی سی نے اجلاس میں کوئی فیصلہ نہ ہونے پر اسے ملتوی کر دیا تھا۔
یہ اجلاس اس وقت بلایا گیا تھا جب بی سی سی آئی نے 2025 کے چیمپئنز ٹرافی کے لیے اپنی ٹیم پاکستان بھیجنے سے انکار کر دیا تھا۔ اجلاس میں پی سی بی نے ہائبرڈ ماڈل کے خلاف اپنی پوزیشن دوبارہ دہرائی، جس کے تحت کچھ میچز نیوٹرل مقام پر کرانے کی تجویز دی جا رہی تھی۔
ذرائع کے مطابق، آئی سی سی اس وقت مختلف آپشنز پر غور کر رہی ہے تاکہ چیمپئنز ٹرافی 2025 کے مسائل کا حل تلاش کیا جا سکے۔ اس سلسلے میں مزید مشاورت کے لیے آئی سی سی آئندہ 48 گھنٹوں میں دوبارہ اجلاس بلانے پر غور کر رہی ہے۔
بی سی سی آئی نے ہائبرڈ ماڈل کی تجویز دی ہے، جس کے تحت بھارت کے میچز دبئی میں کرانے کی بات کی جا رہی ہے، تاہم پی سی بی نے اس تجویز کو مسترد کرتے ہوئے اس بات پر زور دیا ہے کہ ٹورنامنٹ پاکستان میں ہی منعقد کیا جائے۔
آئی سی سی کے اس فیصلے کا اثر عالمی کرکٹ کے منظرنامے پر مرتب ہو سکتا ہے اور دونوں ممالک کے درمیان کرکٹ روابط پر اس کا بڑا اثر پڑے گا۔
