کراچی (اسٹاف رپورٹر) ایڈیشنل آئی جی کراچی جاوید عالم اوڈھو نے پولیس ہیڈ کوارٹرز گارڈن میں منعقد سندھ پولیس ہیلتھ فن فیئر کی تقریب میں شرکت کی۔ اس موقع پر اے ڈی آئی جی ایڈمن‘ ایس پی ہیڈ کوارٹرز‘ ڈی ایس پی و دیگر افسران اور پولیس کی فیملیز موجود تھیں۔ ہیلتھ فن فیئر میں فیملیز کے لیے دس اسٹال لگائے گئے ہیں جن میں جنرل و مینٹل ہیلتھ، ڈینٹل ویمن ہیلتھ، چلڈرن ہیلتھ و پولیو ویکسی نیشن، ایجوکیشن، لیب ٹیسٹ اور فوڈز کے اسٹالز لگائے گئے ہیں۔ ان اسٹالز سے پولیس فورس کی فیملیز ڈاکٹرز کی مدد سے فری طبی اور دیگر تعلیمی سہولیات سے استفادہ کر رہے ہیں۔ لیب ٹیسٹ کے اسٹال پر 70 سے زائد افراد کے فری ٹیسٹ اور 120 بچوں کو پولیو ویکسی نیشن کی سہولت فراہم کی جا چکی ہے۔ صحت میلے کا مقصد پولیس کی فیملیز کو صحت سے متعلق آگاہی و ایجوکیشنل گائیڈ لائن کی فراہمی کے ساتھ ساتھ ایک تفریحی ماحول فراہم کرنا ہے۔ صحت میلے میں پولیس چیف و دیگر افسران اور ڈاکٹرز کو ہیلتھی لائف اسٹائل ایوارڈ کی تقسیم کا انعقاد بھی کیا گیا۔
