اسلام آباد (اسپورٹس ڈیسک) سابق ٹینس اسٹار اور پاکستان ٹینس فیڈریشن (پی ٹی ایف) کے صدر اعصام الحق نے اسلام آباد چیمبر آف کامرس اینڈ انڈسٹری(آئی سی سی آئی)کا دورہ کیا جہاں صدر ناصر منصور قریشی، سینئر نائب صدر عبدالرحمن صدیقی، نائب صدر ناصر محمود چوہدری اور ایگزیکٹو ممبران نے ان کا پرتپاک استقبال کیا۔ اس موقع پر اعصام الحق نے پاکستان میں ٹینس کی ترقی کے لئے اپنے ویژن کا اظہار کیا اور ایک جم کے قیام، پلیئرز ٹینس ہٹ کی تزئین و آرائش، کھلاڑیوں کے لئے گیسٹ رومز کو دوبارہ بنانے اور یوٹیوب پر میچز کی لائیو کوریج کو بڑھانے کے منصوبوں کا خاکہ پیش کیا۔ آئی سی سی آئی کی جانب سے صدر ناصر قریشی نے اعصام الحق کو ہونہار کھلاڑیوں کی گرومنگ سمیت ٹینس کے فروغ کے لئے مکمل تعاون کی یقین دہانی کرائی۔
