کراچی( اسٹاف رپورٹر) نیو کراچی گبول گوٹھ میں رنگ بنانے کی فیکٹری میں آتشزدگی کے دوران لاکھوں روپے کا مال جل کر خاکستر ہو گیا۔ تفصیلات کے مطابق بدھ کی صبح نیو کراچی گبول گوٹھ دھماکا ہوٹل کے قریب 2 منزلہ مکان میں قائم رنگ بنانے کی کمپنی میں اچانک آگ بھڑک اٹھی جس نے دیکھتے ہی دیکھتے شدت اختیار کرلی اورآگ نے فیکٹری کی تینوں منزلوں کواپنی لپیٹ میں لے لیا۔ فائربریگیڈ کی 5 فائر ٹینڈرز‘ ایک اسنارکل اورواٹر بائو زر موقع پرپہنچ گئے اور آگ پر قابو پانے کے لیے ریسکیو آپریشن شروع کردیا۔ فائر آفیسر عارف منصوری کے مطابق فیکٹری میں کیمیکل کی زیادہ مقدار ہونے کے باعث فائر فائٹنگ میں پانی کے ساتھ فوم کا استعمال کیا گیا۔آتشزدگی کے باعث فیکٹری کی عمارت کمزور ہو گئی ہے اور فیکٹری کی چھت پرموبائل ٹاور بھی نصب ہے جو کسی خطرے کا سبب بن سکتا ہے۔
