کراچی(اسٹاف رپورٹر)کراچی کے پوش علاقے کلفٹن میںا سنیپ چیکنگ کے دوران مبینہ پولیس مقابلہ ہوا جس کے نتیجے میں 4 ملزمان ہلاک ہوگئے۔ایس پی کلفٹن ماجدہ پروین کے مطابق رات گئے کلفٹن گندا نالہ سٹاپ پر اسنیپ چیکنگ کے دوران مسلح ملزمان اور پولیس کے درمیان مبینہ طور پر فائرنگ کا تبادلہ ہوا جس کے نتیجے میں 4 ملزمان مارے گئے۔پولیس حکام نے بتایاکہ دوران چیکنگ کلفٹن پولیس اور سی ٹی ڈی اہلکاروں کے روکنے پر ملزمان فائرنگ کر کے فرار ہونے لگے، پولیس کی جوابی کارروائی میں چاروں ڈاکو زخمی ہوگئے، جنہیں طبی امداد کے لے اسپتال منتقل کیا گیا جہاں وہ ہلاک ہوگئے۔ ہلاک ملزمان سے4پستول اور دو موٹر سائیکلیں بھی برآمد ہوئی ہیں۔ ڈی آئی جی سائوتھ اسد رضا نے اس حوالے سے بتایا کہ ملزمان میں عبدالستار، سری چند، راج کمار اور نواب احمد شامل ہیں، ہلاک ملزمان کا کرمنل ریکارڈ بھی موجود ہے۔ ملزمان نے 6نومبر کو توحید کمرشل میں واردات کی اور مزاحمت پر سیکورٹی ادارے کے سابق اہلکار سعید کو قتل کیا،، ملزمان مقتول سعید سے 5لاکھ روپے چھین کر لے گئے تھے۔
