کراچی (اسٹاف رپورٹر) شہر کے مختلف علاقوں میں پولیس سے مقابلوں کے دوران 5 ملزمان کو زخمی حالت میں گرفتار کرلیا گیا، ملزمان کے قبضے سے اسلحہ، نقدی، موٹر سائیکل، موبائل فون اور مسروقہ سامان برآمد کیا ہے۔ تفصیلات کے مطابق سائٹ سپر ہائی وے تھانے کی حدود سائٹ سپر ہائی وے نئی سبزی منڈی یوٹرن کے قریب پولیس اور ڈاکوؤں کے درمیان مقابلہ ہوا، دوطرفہ فائرنگ کے تبادلے کے بعد ڈاکوئوں کو زخمی حالت میں گرفتار کر لیا گیا۔ گرفتا ر ملزم کی شناخت30 سالہ گل آغا ولد دین محمد اور امان ولد حضرت خان کے نام سے ہوئی۔ پولیس نے پستول بمع گولیاں اور موٹر سائیکل برآمد کرلی۔ زخمی کو طبی امداد کے لیے ہسپتال منتقل کر دیا گیا ہے‘ مزید تفتیش جاری ہے۔ ادھر ڈیفنس تھانے کی حدود ڈیفنس فیز ون اختر کالونی آغا خان سگنل کے قریب پولیس اور ڈاکوؤں کے درمیان مقابلہ ہوا، ملزمان شہری عبدالرزاق اور اس کی فیملی سے موبائل فون اور نقدی چھین کر فرار ہو رہے تھے کہ قریب ہی پولیس کو دیکھ کر پولیس پر فائرنگ کر دی۔ دو طرفہ فائرنگ کے تبادلے کے بعد ایک ڈاکو زخمی حالت میں گرفتار ہوا، گرفتا ر ملزم کی شناخت 25 سالہ عمر مصطفی ولد غلام مصطفی کے نام سے ہوئی۔ ملزم کا ساتھی موقع سے فرار ہونے میں کامیاب ہوگیا۔ پولیس نے چھینے گئے موبائل فونز اور موٹر سائیکل کے ساتھ پستول برآمد کر لیا۔ زخمی کو طبی علاج کے لیے ہسپتال منتقل کر دیا گیا ہے اور مزید تفتیش جاری ہے جبکہ کورنگی تھانے کی حدودکورنگی ضیا کالونی النور سوسائٹی میں پولیس اور ڈاکوؤں کے درمیان مقابلہ ہوا، دوطرفہ فائرنگ کے تبادلے کے بعد 02 ڈاکو زخمی حالت میں گرفتار ہوئے۔
