کراچی (اسٹاف رپورٹر) شہر کے مختلف علاقوں میں حادثات و پر تشدد اقعات میں بچے اور خاتون سمیت 11افراد جاں بحق ہوگئے‘ دیگر واقعات میں 5افراد زخمی ہوئے۔ تفصیلات کے مطابق سرجانی ٹائون تھانے کی حدود حسن بروہی گوٹھ میں گھر سے گلا کٹی خاتون کی لاش ملی جسے تیزدھار آلے کے وار کرکے قتل کیا گیا۔ مقتولہ خاتون کی شناخت 22سالہ اقرا دخترعاشق علی کے نام سے کی گئی۔ پولیس نے مقتولہ کے شوہر فیضان علی ولد عبدالعزیز کو گرفتار کرلیا۔ سچل کے علاقے سپر ہائی وے بندو خان ہوٹل اسکیم 33 جمالی پل گلشن رومی کے قریب نامعلوم ملزمان کی فائرنگ سے 61 سالہ سید محمد انورشاہ ولد وزیر شاہ نامی شخص جاں بحق ہو گیا جو مکان نمبر 887 دستگیر کالونی لطیف آباد حیدر آباد کا رہائشی اور9 بچوں کا باپ تھا۔ بوٹ بیسن کے علاقے کلفٹن بلاول ہائوس بن قاسم پارک عبداللہ شاہ غازیؒ مزار سے سی ویو جاتے ہوئے تیز رفتار گاڑی کی ٹکرسے موٹرسائیکل سوار 20سالہ یاسر رحمن ولد سیف الرحمن نامی نوجوان جاں بحق ہوگیا۔ بفر زون کچی آبادی پیالہ ہوٹل بروہی گوٹھ کے قریب پھندا لگی35سالہ زوہیب ولد رمضان کی لاش ملی۔ عزیز بھٹی تھانے کی حدود ڈالمیا شانتی نگر نیشنل سیمنٹ فیکٹری کے قریب گھر کی چھت سے گر کر 42سالہ کشنولد رام جی ہلاک ہوگیا۔ گلستان جوہر میں دوسری منزل پر کام کے دوران 23 سالہ شخص گرکر جاں بحق ہوگیا ، متوفی کو زخمی حالت میں اسپتال منتقل کیا گیا جہاں وہ دوران علاج دم توڑ گیا۔ فیڈرل بی ایریا لکی ون شاپنگ مال کے قریب دوران کام بلڈنگ سے گرکر مزدور جابحق ہوگیا ،متوفی کی لاش کو قانونی کارروائی کے لیے اسپتال منتقل کر دیا گیا۔ مومن آباد تھانے کی حدود اورنگی ٹائون سیکٹر ساڑھے گیارہ بابا شاہ ولایت کالونی میں زہریلی چیز کھانے سے 25 سالہ وقاص نامی نوجوان جاں بحق ہوگیا۔ ایس ایچ او مومن آباد نے بتایا کہ پولیس اسپتال میں موجود ہے جو اہلخانہ سے واقعہ سے متعلق معلومات حاصل کر رہی ہے جس کے بعد ہی کچھ کہا جا سکتا ہے۔ شاہ لطیف ٹاؤن تھانے کی حدود صالح محمد گوٹھ بیت اللہ باغ میں سرکاری اسکول کی پرانی دیوار گرنے سے نصیر احمد ولد ولی محمد جاں بحق ہوگیا‘ دیوار کے ملبے میں دب کر واحد نبی بخش زخمی ہوگیا۔ ذرائع کا کہنا ہے کہ رقم کی عدم دستیابی کے باعث عمارت کا کام رکا ہوا تھا اور تدریسی عمل بھی بند تھا، خالی اور خستہ عمارت سے چور سریا نکال کر فروخت کرتے رہتے تھے۔دیواروں اور چھتوں کو توڑ کر سریا نکال کر فروخت کرنے والے 2 افراد دیوار گرنے سے دب گئے۔ ایک شخص جاں بحق اور ایک شدید زخمی ہوا۔ زخمی و ہلاک ہونے والے دونوں افراد کو جناح اسپتال منتقل کردیا گیا۔ گلشن معمار تھانے کی حدود ناردرن بائی پاس انڈس ولیج کے قریب گٹر سے5 دن پرانی ڈوبی ہوئی5سالہ عبدالواسب ولد عبدالواحد نامی بچے کی لاش برآمد ہوئی۔ لاش کو طبی امداد کے لیے عباسی اسپتال منتقل کیا گیا۔ اورنگی ٹاؤن کے علاقے اورنگی ٹائون سیکٹر 6 ای، مجاہدآباد سوسائٹی کے قریب 35سالہ شخص نالے میں ڈوب کر جاں بحق ہو گیا۔
