دبئی:کیا آپ نے کبھی سنا کہ سونے کی الیکٹرک کار بھی قرعہ اندازی کے ذریعے جیتی جا سکتی ہے؟ دبئی میں اس کا ایک شان دار موقع سامنے ہے۔
بین الاقوامی خبر رساں اداروں کے مطابق دبئی میں لوگوں کے لیے سونے کی الیکٹرک کار قرعہ اندازی کے ذریعے سے جیتنے کا ایک موقع دیا جا رہا ہے۔ یہ کار دبئی کے گولڈ سوک ایکسٹینشن لکی ڈرا کو جیتنے والے خوش نصیب کو ملے گی۔
سونے کی الیکٹرک کار کو قرعہ اندازی میں جیتنے کا موقع فراہم کرنے والے ایونٹ کے منتظمین کا کہنا ہے کہ رواں ماہ (14 نومبر) سے شروع ہونے والے اس ایونٹ میں شریک افراد اگر یہاں آؤٹ لیٹس پر 500 درہم خرچ کریں گے تو وہ اس مشہور سونے کی الیکٹرک کار جیتنے کا موقع حاصل کرنے کے لیے ایک ری فل ٹکٹ کے مالک بن سکتے ہیں۔ یہ ایونٹ 29 دسمبر تک جاری رہے گا۔
ایونٹ کے منتظمین نے انعام کے طور پر دینے کے لیے تیار رکھی اس سونے کی سائبر الیکٹرک کار کی قیمت سے متعلق کچھ نہیں بتایا، تاہم اس کا اندازہ یوں لگایا جا سکتا ہے کہ سونے کے بغیر اس نئی گاڑی کی قیمت کم و بیش 4 لاکھ 90 ہزار اماراتی درہم (پاکستانی 3 کروڑ 70 لاکھ روپے)ہے۔
یاد رہے کہ یہ ایونٹ (دبئی گولڈ سوک ایکسٹیشن ڈرا) ایک ایسے منصوبے کا حصہ ہے ، جس میں تقریباً 300 دکانیں شامل ہیں، جہاں پر شرکا کو کم از کم 500 درہم خرچ کرکے خود کو اہل افراد میں شامل کرنا ہوگا۔
