سکھر (نمائندہ جسارت) ترجمان سندھ حکومت و میئر سکھر بیرسٹر ارسلان اسلام شیخ نے یوسف اعوان کے اعزاز میں میئر ہاؤس میں ایک پروقار تقریب کا اہتمام کیا۔ تقریب سے خطاب کرتے ہوئے میئر نے کہا کہ یوسف اعوان نے تھائی لینڈ میں باڈی بلڈنگ کے مقابلے کی کلاسک کیٹگری میں پاکستان کے لیے سونے کا تمغہ جیت کر دنیا میں ملک کا نام روشن کیا ہے۔ ترجمان سندھ حکومت و میئر سکھر نے کہا کہ جستجو رکھنے والوں کو اللہ پاک اسی طرح کامیاب کرتا ہے۔ انہوں نے کہا کہ تھائی لینڈ مقابلوں کے بعد آئندہ دبئی، امریکا اور دیگر ممالک میں بھی بین الاقوامی اعزازات حاصل کریں گے اور ملک کا نام مزید روشن کریں گے۔ اس موقع پر میئر سکھر نے یوسف اعوان کو نقد انعام اور دبئی میں باڈی بلڈنگ کے مقابلوں میں حصہ لینے کے لیے ریٹرن ٹکٹ دینے کا اعلان بھی کیا۔ بیرسٹر ارسلان اسلام شیخ نے یوسف اعوان اور ان کے ساتھیوں کو اجرک اور ہار پہنائے۔ اس موقع پر یوسف اعوان نے کہا کہ ہم ترجمان سندھ حکومت و میئر سکھر بیرسٹر ارسلان اسلام شیخ کے بے حد مشکور ہیں جنہوں نے ہمیں عزت بخشی، میری بھرپور کوشش ہو گی کہ پاکستان کے لیے مزید اعزازات لے کر آؤں گا۔
