کراچی: شہر قائد میں 4 روزہ بین الاقوامی دفاعی نمائش آئیڈیاز2024 کا آغاز ہوگیا۔ وفاقی وزیر دفاع خواجہ آصف، گورنر سندھ کامران خان ٹیسوری اور وزیر تجارت جام کمال نے دفاعی نمائش کا افتتاح کیا۔
ایکسپو سینٹر کراچی میں عالمی دفاعی نمائش19تا 22 نومبرتک جاری رہے گی۔ نمائش میں دنیا کے 55 ممالک کے 330 غیر ملکی نمائش کنندگان شریک ہیں۔
افتتاحی تقریب میں سفارتکار، بین الاقوامی وفود، دفاعی ماہرین، صنعتکار، سینئر سول و فوجی افسران اور دیگر اعلیٰ شخصیات نے شرکت کی۔ تقریب کے دوران بینڈ ڈسپلے اور پریڈ پرفارمنس کا مظاہرہ بھی کیا گیا۔
وفا قی وزیر دفاع خواجہ محمد آصف، گورنر سندھ کامران خان ٹیسوری اوردیگر وفاقی وزراء نے ایکسپو سینٹر میں دفاعی نمائش کے مختلف پویلینز کا دورہ بھی کیا۔
آئیڈیاز 2024 میں 33 غیرملکی وفود بھی شرکت کر رہے ہیں۔ دفاعی نمائش میں چین اور ترکیہ کی کمپنیز کیلئے تین پویلینز بنائے گئے ہیں۔
عالمی دفاعی نمائش میں جدید ٹیکنالوجی سے لیس دفاعی ساز و سامان بھی پیش کیا جائے گا۔ ایران، اٹلی اور یوکرین پہلی بار نمائش میں شریک ہو رہے ہیں۔
