اسلام آباد (صباح نیوز ) بیلا روس کے صدر الیگزینڈر لوکاشینکو25 نومبر کو وفد کے ساتھ اسلام آباد پہنچیں گے۔ بیلا روس کے صدر، صدر مملکت آصف زرداری اور وزیر اعظم شہباز شریف سے ملاقاتیں کریں گے۔ سفارتی ذرائع کے مطابق وزیراعظم کی دعوت پر الیگزینڈر لوکاشینکو 2 روزہ دورہ کر رہے ہیں۔ پاکستان بیلا روس ٹریڈ روڈ میپ 27-2025 پر دستخط کیے جائیں گے، زراعت، تجارت، سائنس و ٹیکنالوجی، ادویات سازی کے شعبوں میں تعاون کی 4 مفاہمتی یادداشتوں پر دستخط کیے جائیں گے، دونوں ممالک الیکٹرک وہیکل بسز کی پیداوار کے منصوبے کو حتمی شکل دینے پر غور کریں گے۔ ذرائع کا کہنا ہے کہ زرعی مشینری و ٹریکٹر کی تیاری کی صنعت میں تعاون پر بھی تبادلہ خیال کیا جائے گا۔ بیلا روس کے صدر کی فوجی قیادت سے ملاقات کا بھی امکان ہے۔
