سڈنی(اسپورٹس ڈیسک)آسٹریلیا اور پاکستان کی کرکٹ ٹیموں کے درمیان3 ٹی ٹوئنٹی انٹرنیشنل میچوں پر مشتمل سیریز کا دوسرا میچ آج سڈنی کرکٹ گرائونڈ ،سڈنی میں کھیلا جائے گا۔آسٹریلیا کو3 میچوں کی سیریز میں 0-1 کی برتری حاصل ہے۔ کینگروز نے پہلے ٹی ٹوئنٹی میچ میں پاکستان کی ٹیم کو 29رنز سے شکست دی تھی۔دونوں ٹیمیں دوسرے ٹی ٹوئنٹی میچ کے لئے سڈنی پہنچ چکی ہیں ۔ٹی ٹوئنٹی سیریز میں پاکستان ٹیم کی قیادت مایہ ناز وکٹ کیپر بلے باز محمد رضوان کریں گے جبکہ میزبان آسٹریلوی ٹیم کو جوش انگلس لیڈ کریں گے۔ پاکستان کی کرکٹ ٹیم ان دنوں دورہ آسٹریلیا پر ہے جہاں وہ میزبان ٹیم کے خلاف 3 ون ڈے میچوں کی سیریز کھیل چکی ہے جس میں گرین شرٹس نے کینگروز کو 1-2 سے شکست دی تھی۔پاکستان نے 22 سال بعد آسٹریلیا کو اس کے ہوم گرائونڈ پر ون ڈے سیریز میں شکست دی۔ دونوں ٹیموں کے کپتانوں نے سیریز میں کامیابی کے لئے بیانات دیئے ہیں اور ٹی ٹوئنٹی سیریز میں انتہائی دلچسپ اور کانٹے دار مقابلوں کی توقع کی جارہی ہے۔ تیسرا اور آخری ٹی ٹوئنٹی میچ 18 نومبر کو بیلریو اوول ہوبارٹ میں کھیلا جائے گا۔ٹی ٹوئنٹی سیریز کے تینوں میچز نائٹ ہوں گے اور فلڈلائٹس کی روشنی میں کھیلے جائیں گے۔
