کراچی (اسپورٹس رپورٹر) متحدہ عرب امارات میں پاکستان کے سفیر فیصل نیاز ترمذی نے عرب کلاسک دبئی میں پاکستانی بیس بال ٹیم کو بھارت کے خلاف فتح پرمبارکباد دی ہے۔ گزشتہ روزیہاں موصولہ پیغام کے مطابق فیصل نیاز ترمذی نے پاکستان کی بیس بال ٹیم کی عرب کلاسک دبئی میں بھارت کے خلاف 0-12 سے شاندار کامیابی پر دلی مبارکباد پیش کرتے ہوئے کھلاڑیوں کے مثالی جذبے ، عزم اور ٹیم ورک کے ساتھ ساتھ بیس بال ٹیم کو کامیابیوں کیلئے تیار کرنے میں انتظامیہ کی لگن کو بھی سراہا۔ انہوں نے کہا کہ یہ سنسنی خیز میچ بیس بال یونائیٹڈ بال پارک، سیونز، دبئی میں کھیلا گیا ۔ میچ نے پرزور شائقین کو اپنی جانب متوجہ کیا اور بیس بال کے کھیل میں پاکستان کی موجودگی بھی اجاگر کیا۔ پاکستانی سفیر نے ٹورنامنٹ میں ٹیم کی مسلسل کامیابیوں کیلئے اپنی نیک خواہشات کا اظہار کیا جس سے عالمی سطح پر پاکستان کی نمائندگی کرنے والے کھلاڑیوں کیلئے سفارتخانہ کی حمایت کے عزم کو بھی تقویت ملی ہے۔
