لندن (اسپورٹس ڈیسک)لیور پول نے یوئیفا چیمپئنز لیگ کے ایک میچ میں بائر لیورکوسن کو یکطرفہ مقابلے کے بعد 0-4 گول سے ہرا دیا۔لوئس ڈیاز نے اپنی ہیٹ ٹرک مکمل کی جبکہ کوڈی گکپو نے ایک گول کر کے اپنی ٹیم کی فتح میں کلیدی کردار ادا کیا۔ یہ لیور پول کی یوئیفاچیمپئنز لیگ میں مسلسل چوتھی فتح ہے اور لیور پول کی ٹیم بدستور ٹاپ پوزیشن پر برقرار ہے۔ اینفیلڈ، لیورپول، انگلینڈ میں کھیلے گئے میچ میں لیورپول اور بائر لیورکوسن کی ٹیمیں آمنے سامنے تھیں۔میچ کے پہلے ہاف پر کوئی ٹیم گول نہ کرسکی اور میچ کا پہلا ہاف بغیر کسی گول ختم رہا۔دوسرے ہاف میں میچ کے 61 ویں منٹ پر لیورپول کے لوئس ڈیاز نے ایک گول کر کے اپنی ٹیم کو ایک گول کی برتری دلا دی۔ اس کے بعد کوڈی گکپو نے 63 ویں منٹ پر ایک گول کر کے مقابلہ 0-2 کر دیا۔ لوئس ڈیاز نے 83 ویں اور اس کے بعد اختتامی لمحات میں یکے بعد دیگرے دو گول کرتے ہوئے نہ صرف اپنی ہیٹ ٹرک مکمل کرلی بلکہ مقابلہ 0-4 کر دیا۔
