کراچی ( اسٹاف رپورٹر ) شہر کے مختلف علاقوں میں حادثات وواقعات میں بچی اور خاتون سمیت 5افراد جاںبحق ہوگئے دیگر واقعات میں 6افراد زخمی ہوئے ۔ تفصیلات کے مطابق رضویہ تھانے کی حدود گولیمار عثمانیہ کالونی میں قریب گھر سے 35سالہ سلیمان ولد سلطان کی پھندا لگی لاش ملی، متوفی کی لاش کو قانونی کارروائی کے لیے عباسی شہید اسپتال منتقل کر دیا گیا ۔ نیو کراچی کے علاقے مسلم ٹاؤن میں گھر سے 32 سالہ نسرین کی پھندا لگی لاش ملی ،متوفیہ کی لاش کو قانونی کاروائی کے لیے عباسی شہید اسپتال منتقل کر دیا گیا ۔ کورنگی نمبر 6 میں واٹرٹینکر کی ٹکر سے 6 سال کی بچی جاں بحق ہوگئی اور کورنگی سنگر چورنگی پربھی واٹرٹینکر نے ایک شخص کی جان لے لی۔ حادثات کے بعد پولیس نے واٹر ٹینکرز کو قبضے میں لے لیا تاہم ڈرائیور فرار ہوگیا ۔ پورٹ قاسم اسٹیل ٹاؤن قائد اعظم پارک کے قریب ٹریفک حادثے میں ایک شخص جاںبحق ہوگیا ۔ حادثے میں ڈمپر ڈرائیور موقع سے فرار ہوگیا جب کہ ڈمپر کو تحویل میں لے لیا گیا ہے۔ سائٹ اے تھانے کی حدود لیبر اسکوائر نزد فلپس کمپنی کے قریب سے 60سالہ نواب خان ولد محمد عمر برہمائی نامی شخص کی لاش ملی ،متوفی کی لاش کو متعلقہ تھانے سے ضابطہ کی کارروائی کے بعد ایدھی ہوم سہرااب گوٹھ سرد خانے منتقل کر دیا گیا۔
