سکھر (نمائندہ جسارت) پریس کلب میں آج مرحوم جرنلسٹس کی یاد میں منعقد ہونے والی تقریب یوم یادگار ہم نہیں بھولیں گے، کی تیاریاں مکمل ہوگئیں، پی ایف یو جے کے سیکرٹری فنانس، پریس کلب کے قائد لالا اسد پٹھان کی سربراہی میں پریس کلب ،سکھر یونین آف جرنلسٹس ، فوٹو جرنلسٹس ایسوسی ایشن، سیفما، کورٹ رپورٹرز ایسوسی، ویمن جرنلسٹس ایسوسی ایشن سے وابستہ تمام عہدیداران ، ممبران ایگزیکٹو کمیٹی کا اجلاس منعقد ہوا۔ اجلاس میں صدر پریس کلب آصف ظہیر خان لودھی، نائب صدور شہزاد تابانی، سحرش کھوکھر، صدر ایس یو جے امداد بوزدار، جنرل سیکرٹری احقر شاہ رضوی، ممبر ایف ای سی جاوید جتوئی سمیت عہدیداران و ممبران ایگزیکٹو کمیٹی نے بھرپور شرکت کی۔ اجلاس میں یادگار تقریب کی حتمی تیاریوں کی بابت جائزہ سمیت دیگر اہم اُمور پر مشاورت ہوئی۔ لالا اسد پٹھان نے خطاب کرتے ہوئے کہا کہ یوم یادگار تقریب پریس کلب کی تاریخی تقریب ہوگی جس میں مرحوم جرنلسٹس کے رشتہ دار لواحقین سمیت ریجن بھر کی صحافی برادری، سیاسی سماجی تجارتی اہم شخصیات، عمائدین شہر شریک ہوں گے، تقریب میں مرحوم جرنلسٹس کے ایصال ثواب کے لیے فاتحہ خوانی دُعائے مغفرت کی جائے گی اور ان کی صحافتی شعبہ میں خدمات کو خراج عقیدت پیش کیا جائے گا۔
