اسلام آباد (مانیٹرنگ ڈیسک ) حکومت نے ملک بھر کے تمام ائر پورٹس پر بائیو میٹرک مشینیں نصب کرنے کا فیصلہ کرلیا۔ وزارت داخلہ نے بین الاقوامی مسافروں کی بائیو میٹرک تصدیق لازمی قراردے دی، وزارت داخلہ نے ایف آئی اے کو فوری اقدامات اٹھانے کے لیے مراسلہ جاری کر دیا۔ مراسلہ میں کہا گیا ہے کہ بائیو میٹرک تصدیق کے باعث اشتہاری و مطلوب ملزمان کا اندرون اور بیرون ملک سفر کرنا ناممکن ہو گا، بائیو میٹرک مشینیں ائر پورٹس انٹرنیشنل امیگریشن کاؤنٹرز پر لگائی جائیں۔ وزارت داخلہ کی جانب سے جاری مراسلہ میں مزید کہا گیا ہے کہ بائیو میٹرک سے مسافروں کی مؤثر جانچ پڑتال کو یقینی بنایا جائے گا، اقدام کا مقصد سیکورٹی کو مزید بہتر اور بین الاقوامی معیار کے مطابق بنانا ہے۔
