کراچی ( اسٹاف رپورٹر ) شہر کے مختلف علاقوں میں مقابلوں کے دوران2 ڈاکو ہلاک ہوگئے دیگر مقابلوں میں زخمیوں سمیت 6ڈاکو گرفتار کر لیے گئے ،ملزما ن کے قبضے سے اسلحہ ،موبائل فون ،موٹر سائیکل ، نقدی اور مسروقہ سامان برآمد ہوا ملزمان کی فائرنگ کی زد میں آکر پولیس اہلکاربھی زخمی ہوا ۔ تفصیلات کے مطابق گلبہار تھانے کی حدود نیو گولیمار فردوس کالونی ثناء ٹاور لال مسجد پوسٹ آفس کے قریب پولیس اور ڈاکوؤں کے درمیان مبینہ مقابلہ ہوا، فائرنگ کے تبادلے کے دوران 2 ڈاکو موقع پر ہی ہلاک ہوگئے۔ تاہم ایس ایس پی ساؤتھ آفس میں تعینات پولیس اہلکار 45سالہ بابر ولد برکت ملزمان کی فائرنگ سے زخمی ہوا۔ زخمی پولیس اہلکار اور ملزمان کی لاشوں کو اسپتال منتقل کر دیا گیا ہے۔ پولیس کا کہنا ہے کہ پولیس اہلکار بابر ثنا ٹاور کے عقب میں گھر کے باہر بیٹھا ہوا تھا کہ موٹر سائیکل سوار 2 ڈاکوئوں نے اس سے لوٹ مار کی اور کچھ فاصلے پر ایک اور شہری کو لوٹ رہے تھے کہ اس دوران پولیس اہلکار بابر ڈاکوئوں کے تعاقب میں وہاں پہنچ گیا اور اپنے لائسنس یافتہ اسلحے سے فائرنگ کر دی۔تاہم، ڈاکوئوں کی فائرنگ سے پولیس اہلکار ٹانگ پر گولی لگنے سے زخمی ہوگیا اور اس کی جوابی فائرنگ سے دونوں ڈاکو ہلاک ہوگئے۔
