اسلام آباد : وفاقی حکومت نے دسمبر اور جنوری میں ملک بھر میں سی این جی اسٹیشنز بند کرنے کا فیصلہ کیا ہے، جو کہ گیس لوڈ مینجمنٹ کی حکمت عملی کا حصہ ہے۔
وزارت پیٹرولیم نے اعلان کیا ہے کہ ان مہینوں کے دوران گیس کی مؤثر فراہمی کو یقینی بنانے کے لیے سی این جی اسٹیشنز بند کر دیے جائیں گے ۔
حکام کا کہنا ہے کہ اس دوران بجلی پیدا کرنے والے صنعتی یونٹس کے لیے بھی گیس کی فراہمی معطل رہے گی۔ وزارت کے مطابق، اس فیصلے کا مقصد سردیوں کے مہینوں میں گھریلو صارفین کے لیے قدرتی گیس کی مسلسل فراہمی کو یقینی بنانا ہے۔
اس کے نتیجے میں، تمام صوبوں میں وہ صنعتیں جو گیس پر بجلی پیدا کرتی ہیں یا کیپٹیو پاور پلانٹس رکھتی ہیں، دسمبر 2024 سے جنوری 2025 تک گیس کی فراہمی میں خلل کا سامنا کریں گی۔ ان صنعتوں کو اس دوران بجلی کی فراہمی کے لیے یوٹیلیٹی کمپنیوں پر انحصار کرنا ہوگا۔
سوی نادرن گیس پائپ لائنز لمیٹڈ (ایس این جی پی ایل) کو ہدایت کی گئی ہے کہ وہ یکم دسمبر سے 31 جنوری 2025 تک سی این جی اسٹیشنز کو بند کرنے اور ان کے گیس کنکشنز منقطع کرنے کے احکامات جاری کرے ۔
وزیرپیٹرولیم مصدق ملک کے زیر صدارت اجلاس میں یہ بات سامنے آئی کہ قدرتی گیس کی سالانہ پیداوار میں پانچ فیصد کی کمی واقع ہو رہی ہے۔ لہذا، حکومت گیس لوڈ مینجمنٹ کا نفاذ کرے گی۔
اگرچہ خیبر پختونخوا (کے پی) میں گیس کی پیداوار جاری ہے جو کہ سندھ کے برابر ہے، لیکن فیصلہ کیا گیا ہے کہ دونوں صوبوں میں دسمبر اور جنوری کے ابتدائی دو مہینوں میں سی این جی اسٹیشنز بند رہیں گے۔
اس سال کے آغاز میں، وفاقی حکومت نے کے پی حکومت سے درخواست کی تھی کہ وہ ایس این جی پی ایل کی سردیوں کے گیس لوڈ مینجمنٹ پلان کے نفاذ میں تعاون کرے۔ یہ درخواست اس وقت کی گئی جب پشاور انتظامیہ نے سی این جی اسٹیشنز کو قدرتی گیس کی فراہمی معطل کرنے میں تعاون کرنے سے انکار کر دیا۔
ایس این جی پی ایل نے اعلان کیا کہ کے پی کے تمام سی این جی اسٹیشنز ایک ماہ تک گیس کے بغیر رہیں گے اور مقامی حکام سے اس فیصلے کو نافذ کرنے کی درخواست کی ہے ۔
توانائی کی وزارت کی جانب سے صوبائی چیف سیکرٹری کو بھیجے گئے ایک خط میں کہا گیا ہے کہ سردیوں کے عروج کے موسم میں گھریلو گیس کی فراہمی کو ترجیح دینے کے لیے کے پی میں سی این جی سیکٹر کو گیس کی فراہمی کم کرنا ضروری ہے۔
گیس کی فراہمی کی معطلی نے عوام میں مایوسی پیدا کی ہے، خاص طور پر ان ٹرانسپورٹ سروسز پر اثر انداز ہوا ہے جو گیس پر منحصر ہیں ۔ بہت سے عوامی ٹرانسپورٹ کے وسائل سڑکوں پر نہیں تھے کیونکہ گیس اسٹیشنز بند رہے۔
