اسلام آباد( نمائندہ جسارت) پاکستان میں واٹس ایپ اکاؤنٹس پر سائبر حملوں میں اضافہ ہوگیا، ہیکنگ کے ذریعے واٹس ایپ صارفین کی حساس کمیونیکیشن تک رسائی کا انکشاف ہوا ہے۔پاکستان میں واٹس ایپ اکاؤنٹس پر سائبر حملوں میں اضافے کے پیش نظر نیشنل کمپیوٹر ایمرجنسی رسپانس ٹیم (این سی ای آر) نے احتیاطی تدابیر اختیار کرنے کے لیے ایڈوائزری جاری کردی۔سائبر سیکورٹی ایڈوائزری میں صارفین کو اہم حفاظتی اقدامات کی ہدایت کی گئی ہے، صارفین سے کہا گیا ہے کہ وہ ہیکنگ سے بچنے کے لیے واٹس ایپ پر مضبوط پاس ورڈ استعمال کریں اور کسی بھی نامعلوم لنکس پر کلک کرنے سے گریز کریں۔صارفین اپنے واٹس ایپ اکاونٹ کو بایو میٹرک کے ذریعے لاک رکھیں، عوامی مقامات پر وائی فائی پر واٹس ایپ کا استعمال سائبر حملوں کا باعث بن سکتا ہے۔ایڈوائزری میں صارفین کو کلاؤڈ بیک اپ غیرفعال کرنے کی ہدایت کی گئی ہے، صارفین واٹس ایپ پر بلٹ ان سیکورٹی فیچرز استعمال کریں، صارفین اینٹی وائرس اور اینٹی مال وئیر سافٹ ویئر انسٹال کریں۔ایڈوائزری میں صارفین کو واٹس ایپ سیکورٹی اپ ڈیٹس سے متعلق آگاہ رہنے کی ہدایت کی گئی ہے کہ سرکاری ملازمین، صارفین احتیاطی تدابیر اپنا کر سائبر حملوں سے آفیشل ڈیٹا محفوظ رکھ سکتے ہیں، صارفین کسی بھی مشکوک سرگرمی کو فوری طور پر رپورٹ کریں۔
