تہران : ایران کے وزیر دفاع بریگیڈیئر جنرل عزیز ناصر زادہ نے دعویٰ کیا ہے کہ ایران کی دفاعی طاقت اتنی مضبوط ہے کہ وہ اسرائیل کے زیر قبضہ فلسطینی علاقوں میں “آپریشن ٹرو پرومیس” جیسے درجنوں حملے کرنے کی صلاحیت رکھتا ہے۔
پارلیمنٹ کی کمیٹی برائے قومی سلامتی اور خارجہ پالیسی کے ترجمان ابراہیم رضائی نے وزیر دفاع کے اس بیان کی تصدیق کرتے ہوئے کہا کہ ایران کی دفاعی طاقت “بے حد مضبوط” ہے۔
یاد رہے کہ ایران نے رواں سال اپریل میں اسرائیلی جارحیت کا جواب دیتے ہوئے “آپریشن ٹرو پرومیس” کے تحت 300 سے زائد میزائل اور ڈرون مقبوضہ علاقوں پر داغے تھے۔ حال ہی میں، تہران نے اس آپریشن کے دوسرے مرحلے “ٹرو پرومیس II” کے تحت اسرائیلی فوجی اور انٹیلی جنس اڈوں کو نشانہ بناتے ہوئے 200 میزائل داغے، جن میں سے تقریباً 90 فیصد نے اپنے اہداف کو کامیابی سے نشانہ بنایا۔
وزیر دفاع نے مزید کہا کہ حالیہ اسرائیلی حملے جو ایرانی صوبوں میں دفاعی تنصیبات پر کیے گئے، ایران کے دفاعی نظام کو متاثر کرنے میں ناکام رہے ہیں۔ انہوں نے کہا کہ دشمن کے یہ حملے ایران کے میزائل اور دفاعی نظام کی تیاری کے عمل کو روکنے میں ناکام رہے ہیں۔
ایرانی حکام کے مطابق، ان حملوں کا مقصد خطے میں مزید جارحیت کا مقابلہ کرتے ہوئے دفاعی صلاحیت کو مزید بہتر بنانا اور اسرائیلی مظالم کا بھرپور جواب دینا ہے۔
