کراچی (اسپورٹس رپورٹر)8 سالہ محمد ریان زمان نے دوحا قطر انٹرنیشنل جونیئر اسکواش چیمپئن شپ میں انڈر 11کیٹیگری میں چاندی کا تمغہ حاصل کیا۔ لیجنڈری ورلڈ ا سکواش چیمپئن قمر زمان کے پوتے اور ایشین چیمپئن منصور زمان کے بیٹے ریان زمان نے ٹورنامنٹ میں غیرمعمولی مہارت اور عزم کا مظاہرہ کیا۔ سنسنی خیز فائنل میچ میں زمان کا مقابلہ ملائیشیا کے ڈیلن سدن سے ہوا تاہم وہ 11-9، 11-19، 12-10 سے ہار گئے اور چاندی کا تمغہ حاصل کیا۔ یہ کامیابی نوجوان ا سکواش پروڈیوجی کے لیے ایک روشن آغاز کی نشاندہی کرتی ہے جو اپنے خاندان کے نامور افراد کے نقش قدم پر چلنے کے لیے تیار ہے۔ریان زمان کے اہل خانہ نے خوشی کا اظہار کرتے ہوئے کہا کہ ہمیں ریان کے چاندی کا تمغہ حاصل کرنے پر ناقابل یقین حد تک فخر ہے، اس کی محنت اور لگن رنگ لائی ہے۔
