اسلام آباد(صباح نیوز) پاکستان تحریک انصاف کے رکن قومی اسمبلی شیر افضل مروت نے کہا ہے کہ بانی پی ٹی آئی کی رہائی کیلیے اقدامات نہیں کیے جا رہے اور اس وقت پی ٹی آئی کے احتجاجی مظاہرے غیر منظم ہیں، بشری بی بی سیاست میں نہیں آرہیں، علی امین گنڈاپور کو احتجاجی مظاہروں سے الگ کریں، انہوں نے جو کچھ کرنا تھا وہ کر لیا۔ شیر افضل مروت نے میڈیا سے گفتگو میں کہا کہ بانی پی ٹی آئی کا موقف ہے کہ میرے اہلخانہ سیاست میں نہیں ہوں گے اور ہم ان کے اس موقف کی حمایت کرتے ہیں۔ انہوں نے کہا کہ میری رائے ہے وزیر اعلی خیبر پختونخوا علی امین گنڈاپور کو احتجاجی مظاہروں سے الگ کریں۔ انہوں نے جو کچھ کرنا تھا وہ کر لیا۔ مخالفین کے منہ میں یہ بات نہیں ڈالنی کہ ایک صوبے نے دوسرے صوبے پر چڑھائی کی۔ انہوں نے کہا کہ دھرنے کیلیے کارکنوں کی حوصلہ افزائی کی ضرورت ہے لیکن ہم نے کچھ نہیں کیا۔ قیادت کے پاس احتجاج کیلیے منظم حکمت عملی نہیں ہے۔ نئے چیف جسٹس سے متعلق انہوں نے کہا کہ وہ متوازن شخصیت ہیں جب وہ وکیل تھے تب سے ان کی ایمانداری پر یقین ہے۔
