کراچی(اسٹاف رپورٹر)چیف سیکرٹری سندھ آصف حیدر شاہ سے کراچی پریس کلب کے وفد نے ملاقات کی، جس کی سربراہی صدر سعید سربازی اور سیکرٹری شعیب احمد نے کی۔ اس ملاقات میں کراچی پریس کلب کے نئے ممبران کے پلاٹس، ایل ڈی اے کی لیز، ترقیاتی منصوبوں اور دیگر مسائل پر تفصیلی غور کیا گیا۔اس ملاقات میں سیکرٹری محکمہ اطلاعات ندیم الرحمان میمن، جوائنٹ سیکرٹری محمد منصف ، سیکرٹری پلاٹ کمیٹی شمس کیریو، ڈائریکٹر جنرل اطلاعات محمد سلیم خان، اسپیشل سیکرٹری بلدیات، ڈائریکٹر جنرل کے ڈی اے، ایم ڈی اے اور دیگر متعلقہ افراد بھی شریک تھے۔ ملاقات میں صدر اور سیکرٹری کراچی پریس کلب نے ممبران کو درپیش مسائل، نئے ممبرز کے پلاٹ کی الاٹمنٹ ، لیاری ڈیولپمنٹ اتھارٹی کی لیز ، ملیر ڈیولپمنٹ اتھارٹی کے الاٹیز کے پلاٹس اور ترقیاتی اسکیموں کے حوالے سے آگاہ کیا۔ چیف سیکرٹری سندھ نے ممبران کے مسائل کو غور سے سننے کے بعد پریس کلب کی فلاح و بہبود کے حوالے سے مکمل تعاون کی یقین دہانی کروائی۔آصف حیدر شاہ نے وفد کو پریس کلب کے لیے مختص زمین کے مسائل اور اس کی ترقی کے لیے مختلف منصوبوں کے حوالے سے متعلقہ اداروں کو ہدایات جاری کی۔ ان کا کہنا تھا کہ کراچی پریس کلب ایک تاریخی ادارہ ہے، اور اس کے اراکین کی ضروریات کو ترجیحی بنیادوں پر پورا کیا جائے گا۔ حکومت ہر ممکن اقدامات کرے گی تاکہ پریس کلب کے ممبران کی زندگیوں میں مثبت تبدیلی آئے۔ملاقات میں سیکرٹری محکمہ اطلاعات ندیم الرحمان میمن نے ان کی سربراہی میں قائم کمیٹی کے اجلاس میں کیے گئے فیصلوں پر پیشرفت کے حوالے سے آگاہی دی۔ اجلاس کے اختتام پر صدر کراچی پریس کلب سعید سربازی نے حکومت کی جانب سے مسائل کے حل کے لیے دی جانے والی یقین دہانی پر شکریہ ادا کیا اور امید ظاہر کی کہ حکومت کی مدد سے پریس کلب کے ممبران کی زندگیوں میں مثبت تبدیلی آئے گی۔
