راولپنڈی: چیئرمین جوائنٹ چیفس آف اسٹاف کمیٹی سے سری لنکن فضائیہ کے کمانڈر نے ملاقات کی ہے۔
پاک فوج کے شعبہ تعلقات عامہ (آئی ایس پی آر ) کے مطابق سری لنکن فضائیہ کے کمانڈر راؤپ راجا پاکسے نے جوائنٹ اسٹاف ہیڈکوارٹرز کا دورہ کیا جہاں انہیں گارڈ آف آنر پیش کیا گیا۔
آئی ایس پی آر کے مطابق سری لنکن فضائیہ کے کمانڈر نے چیئرمین جوائنٹ چیفس آف ا سٹاف کمیٹی جنرل ساحرشمشاد مرزا سے ملاقات کی اور پاکستان کی مسلح افواج کی پیشہ وارانہ مہارت کو سراہا۔
ایئرمارشل راؤپ راجا پاکسے نے علاقائی امن اور استحکام کیلئے پاکستان کی جاری کوششوں کی بھی تعریف کی، ملاقات میں دوطرفہ سکیورٹی اور دفاعی تعاون بڑھانے کے عزم کا اعادہ کیا گیا۔
اس موقع پر گفتگو کرتے ہوئے جوائنٹ چیفس آف ا سٹاف کمیٹی جنرل ساحر شمشاد مرزا کا کہنا تھا کہ پاکستان سری لنکا کے ساتھ تعلقات کو انتہائی اہمیت دیتا ہے، دوطرفہ تعلقات خصوصاً سکیورٹی اور دفاعی تعاون کو فروغ دیا جائے گا۔
