لاہور ( نمائندہ جسارت) مسلم لیگ ن کے صدر نواز شریف کی لندن روانگی کی تیاری مکمل ہوگئی اور شیڈول بھی طے ہوگیا۔ میڈیا رپورٹس کے مطابق ذرائع کا کہنا ہے کہ نواز شریف کا لندن، امریکا اور یورپ کے دوروں کا شیڈول طے پا چکا ہے، مریم نواز کا نواز شریف کے ساتھ لندن اور یورپ کا شیڈول طے پایا ہے جس کے تحت مسلم لیگ ن کے صدر 25 اکتوبر کو لاہور سے پانچ ممالک کے دوروں کیلیے روانہ ہوں گے۔ذرائع کی جانب سے بتایا گیا ہے کہ نواز شریف دبئی، امریکا، لندن اور یورپ کیلیے روانہ ہوں گے، ممکنہ طور پر ان کے معالج ڈاکٹر عدنان بھی نواز شریف کے ساتھ روانہ ہوں گے، نواز شریف 25 اکتوبر کو لاہور سے دبئی کے لیے روانہ ہوں گے، دبئی میں ایک روز قیام ہوگا جہاں سے وہ لندن جائیں گے، 29 اکتوبر کو لندن سے نواز شریف امریکا جائیں گے، نواز شریف امریکامیں 4 روز قیام کے بعد واپس لندن پہنچیں گے۔ذرائع کا کہنا ہے کہ وزیر اعلیٰ پنجاب مریم نواز شریف نومبر کے پہلے ہفتے لندن جائیں گی، چند روز قیام کے بعد نواز شریف اور مریم نواز دونوں یورپ کے مختلف ممالک کے دورے کریں گے، نواز شریف دوروں کے موقعوں پر اہم ملاقاتیں بھی کریں گے، قبل ازیں پاکستان مسلم لیگ ن کے صدر کی 3 اکتوبر کو لندن روانگی کا پلان بنایا گیا تھا، نواز شریف نے غیر ملکی ائرلائن کی پرواز میں ٹکٹ بھی بک کروا لی تھی تاہم آئینی ترامیم کے باعث انہوں نے اپنا دورہ پہلے ملتوی کیا تھا۔
