کراچی : جامعہ کراچی کے طلبہ نے فیسوں میں اضافے اور جامعہ میں ناقص سہولیات کے خلاف احتجاج وائس چانسلر ڈاکٹر خالد محمود عراقی کے ساتھ کامیاب مذاکرات کے بعد ختم کر دیا ہے۔
آٹھ روزہ احتجاج، جو ‘اسٹوڈنٹ آرگنائزیشنز الائنس’ کے بینر تلے 50 فیصد لیٹ فیس، ناکافی ٹرانسپورٹ سروسز اور خراب انفراسٹرکچر کے خلاف جاری تھا، جمعہ کے روز مطالبات کی منظوری کے بعد ختم کر دیا گیا۔
طلبہ کے مطالبات کیا تھے؟
• 50 فیصد لیٹ فیس کا اضافہ واپس لیا جائے۔
• امتحانی فیس میں حالیہ 120 فیصد اضافہ فوری طور پر واپس لیا جائے۔
• 5000 روپے ری ایڈمیشن فیس ختم کی جائے۔
• کراچی یونیورسٹی میں کاروباری ماڈل لاگو نہ کیا جائے۔
• سیمسٹر فیس سے متعلق نوٹیفکیشن، جس میں طلبہ کو فیس کی عدم ادائیگی پر امتحان میں بیٹھنے کی اجازت نہیں دی جائے گی، منسوخ کیا جائے۔
• “نااہل” کیٹیگری کے تحت لی جانے والی 1500 روپے کی فیس ختم کی جائے۔
• ڈگری فیس میں 200 فیصد اضافہ واپس لیا جائے۔
• یونیورسٹی کی بسوں کی خستہ حالی کو دور کیا جائے۔
• کیمپس کی سیکیورٹی کو بہتر کیا جائے۔
اسٹوڈنٹ الائنس کے مطابق وائس چانسلر خالد عراقی نے طلبہ کے 14 میں سے 11 مطالبات مان لیے ہیں۔ تاہم، جامعہ انتظامیہ کا دعویٰ ہے کہ صرف دو مطالبات تسلیم کیے گئے ہیں۔
لیٹ فیس کو 50 فیصد سے کم کر کے 10 فیصد کر دیا گیا ہے، اور ری ایڈمیشن فیس اب چار سیمسٹروں کے بعد لاگو ہو گی۔ مزید برآں، امتحانی فیس اب کورس کے حساب سے لی جائے گی، جبکہ سیمسٹر فیس میں 10 فیصد اضافہ ہو گا۔
دریں اثناء، جامعہ کراچی میں نااہل فیس کا تعین کرنے کا اختیار اب شعبہ جات کے چیئرپرسنز کو دیا جائے گا۔
