پشاور(آن لائن)تحریک انصاف کے رہنما و مشیر اطلاعات خیبرپختونخوا بیرسٹر ڈاکٹر سیف نے کہا ہے کہ بغض عمران خان میں اندھے حکمران ملک کو ہر طرح کا نقصان پہنچا رہے ہیں، ریاستی جبر کے بعد اب آئینی ترمیم کے ذریعے پی ٹی آئی کو دبانے کی کوشش کی جا رہی ہے، آج پاکستانی عوام جعلی حکمرانوں کے ظلم و ستم کے خلاف بھرپور احتجاج کر رہے ہیں۔ اپنے ایک بیان میں بیرسٹر سیف کا کہنا تھا کہ کارکنان قائد کی ناحق قید کے خلاف احتجاج کر رہے ہیں، اراکین صوبائی اسمبلی، ریسکیو ورکرز اور پی ٹی آئی کے ہزاروں کارکنان کو ناحق قید میں رکھا گیا ہے، ایک آزاد عدلیہ ہی مظالم کے خلاف مئوثر رکاوٹ بن سکتی ہے، جعلی حکمران عدلیہ کی آزادی پر شب خون مارنے جا رہے ہیں، آئینی ترامیم کی منظوری کے لیے پارلیمان میں ہر قسم کا دبا استعمال کیا جا رہا ہے، وکلا برادری سے اپیل ہے کہ عدلیہ کے دفاع میں اپنا کردار ادا کریں۔
