کافی عرصہ بعد کامیابی ملی ہے، جیت بہت ضروری تھی،کپتان شان مسعود

ملتان (نمائندہ خصوصی) قومی ٹیسٹ کرکٹ ٹیم کے کپتان شان مسعود نے کہا ہے کہ مشکل وقت کے بعد کامیابی ملی ہے،پاکستانی کرکٹ کیلئے یہ جیت بہت ضروری تھی،یہ ہمارے اور مداحون کیلئے بہت بڑا ریلیف ہے ہمیں ابھی بہت کچھ کرنے کی ضرورت ہے۔ان خیالات کا اظہار انہوں نے گزشتہ روز ملتان کرکٹ اسٹیڈیم میں انگلینڈ کے خلاف دوسرے ٹیسٹ میچ میں کامیابی کے بعد پریس کانفرنس کرتے ہوئے کیا۔شان مسعود نے کہا کہ ہم میچ میں 20 وکٹیں لینے میں کامیاب ہوئے،ہم نے ملتان میں زیادہ ٹیسٹ میچز نہیں کھیلے،ملتان میں انگلینڈ کے خلاف پہلے ٹیسٹ میں سیمرز کو آزمایا، دوسرے ٹیسٹ میں ہم نے پلان تبدیل کیا اور ا سپنرز کو آزمایا،جب سے میں آیا ہوں ہم نے رسک فری کرکٹ کھیلی ہے ہمیشہ کوشش کی ہے کہ نتائج نکلیں،میچ ہارے بھی ہیں مگر جیتنے کے لیے کوشش کرتے رہے۔انہوں نے کہا کہ یہ کامیابی مشکل وقت اورکافی عرصے بعد ملی ہے،پاکستانی کرکٹ اور مداحوں کے لیے یہ جیت ضروری تھی،پہلی اننگز میں ہمیں لیڈ ملنا بہت اچھا رہا،اس لیڈ نے ہماری مدد کی۔