کراچی (اسٹاف رپورٹر)انسداد دہشت گردی عدالت میں چینی قونصلیٹ حملہ کیس میں گواہ نے مبینہ کالعدم بی ایل اے کے 4 کارندوں کو شناخت کرلیا۔چینی قونصلیٹ حملہ کیس میں اہم پیش رفت سامنے آگئی۔مقدمے کے اہم گواہ تفتیشی افسر نے مبینہ کالعدم بی ایل اے کے4 کارندوں کو اپنی گواہی میں شناخت کرلیا۔گواہ تفتیشی افسر کے مطابق23نومبر 2018ء کو مبینہ کالعدم بی ایل اے کے 3 کارندوں نے چینی قونصلیٹ پر حملہ کیا، کمرہ عدالت میں موجود چاروں ملزمان کو شناخت کرسکتا ہوں، ملزمان احمد حسنین، عبدالطیف، اسلم اور علی احمد کو دھماکا خیز مواد اور اسلحہ کے مقدمات میں گرفتار کیا۔گواہ کے مطابق ملزمان نے اپنے اقبالی بیان میں چینی قونصلیٹ حملے کا اعتراف کیا، ملزمان نے ہلاک دہشت گردوں کو سہولت فراہم کی،ملزمان نے حملہ آوروں کو اسلحہ اور دھماکا خیزمواد فراہم کیا،ملزمان نے ہلاک دہشت گرد کے ساتھ وقوع سے قبل چینی قونصلیٹ کی ریکی کی تھی۔ملزمان کے وکیل عابد زمان نے موقف اختیار کیا کہ مذکورہ مقدمے میں میرے موکلین کا اقبالی بیان ریکارڈ نہیں ہوا،ملزمان کے خلاف جھوٹا مقدمہ درج کیا گیا۔بیرسٹر سارہ عاصم نے بتایا کہ پولیس کے پاس ملزمان کے خلاف کوئی شواہد نہیں۔
