ملتان (نمائندہ خصوصی) پاکستان ٹیسٹ ٹیم کے کپتان شان مسعود نے کہا ہے کہ انگلینڈ ٹیم پہلے ٹیسٹ میں اچھا کھیلی اور جیت گئی، انگلینڈ نے ہمیں سکھایا ہے کہ کیسے جیت کیلئے راستہ نکالنا ہے۔یہ بات انہوں نے گزشتہ روز یہاں ملتان کرکٹ ا سٹیڈیم میں انگلینڈ کے ہاتھوں پہلے ٹیسٹ میچ میں شکست کے بعد میڈیا سے گفتگو کرتے ہوئے کی ۔ شان مسعود نے کہا ہے کہ ہم پچ کو بہت زیادہ لٹریلی لیتے ہیں،امید تھی ملتان کی پچ جلدی ٹوٹے گی،ہم نے کوشش پوری کی کہ پہلی اننگز کو لمبا کھیلیں،ہماری اور انگلینڈ کی ٹیم ایک جیسی تھی،5 دن کے میچ میں کنڈیشنز تبدیل ہوتی رہتی ہیں،میچ کے چوتھے اور 5ویں روز ڈے ون والی پچ نہیں تھی،اس بات پر مایوس ہیں کہ ہم ہار گئے۔
