لڑکیوں کا عالمی دن ہر سال 11 اکتوبر کو منایا جاتا ہے، جس کا مقصد دنیا بھر میں لڑکیوں کے حقوق، چیلنجز اور صنفی امتیاز کے خاتمے کی طرف عالمی شعور کو بیدار کرنا ہے۔
اقوام متحدہ کی جنرل اسمبلی نے 19 دسمبر 2011 کو اس دن کو منانے کی قرارداد منظور کی تھی اور پہلا عالمی دن 2012 میں منایا گیا۔ اس دن کو منانے کا بنیادی مقصد لڑکیوں کو درپیش مسائل، جیسے تعلیم کی کمی، صحت کے مسائل، جبری شادی اور صنفی امتیاز کی نشاندہی کرتے ہوئے ان کے حل کے لیے عالمی کوششوں کو تیز کرنا ہے۔
لڑکیوں کو کئی سماجی اور معاشی مسائل کا سامنا ہوتا ہے جو ان کی ترقی میں رکاوٹ بنتے ہیں۔ اقوام متحدہ کے اعداد و شمار کے مطابق دنیا بھر میں لاکھوں لڑکیاں بنیادی تعلیم سے محروم ہیں، اور کئی جگہوں پر لڑکیوں کی جبری شادی، کم عمری میں حاملہ ہونا، اور صحت کی ناکافی سہولیات جیسے مسائل سنگین صورتحال اختیار کر چکے ہیں۔ اسی لیے عالمی سطح پر ایک ایسا دن منانے کا فیصلہ کیا گیا جس کے ذریعے ان مسائل کو اجاگر کیا جا سکے اور معاشروں میں لڑکیوں کے حقوق اور ان کی ترقی کی اہمیت پر زور دیا جا سکے۔
یہ دن نہ صرف لڑکیوں کے مسائل کی نشاندہی کرتا ہے بلکہ ان کی صلاحیتوں کو اجاگر کرنے کا موقع بھی فراہم کرتا ہے۔ لڑکیاں معاشرتی، تعلیمی اور اقتصادی شعبوں میں کامیابیاں حاصل کر سکتی ہیں اگر انہیں مناسب مواقع فراہم کیے جائیں۔ عالمی دن کے ذریعے اس بات کو یقینی بنایا جاتا ہے کہ لڑکیوں کے حقوق کا احترام ہو اور وہ بلا امتیاز اپنی زندگی کے ہر میدان میں ترقی کر سکیں۔
اقوام متحدہ کا کہنا تھا کہ لڑکیوں کو ترقی دینے سے پوری دنیا میں معاشرتی اور اقتصادی ترقی میں تیزی آئے گی۔ لڑکیوں کی تعلیم، صحت اور مساوی حقوق کی فراہمی ایک مستحکم اور پائیدار دنیا کے قیام کے لیے نہایت ضروری ہیں۔
لڑکیوں کے عالمی دن کے موقع پر مختلف عالمی تنظیمیں اور حکومتیں لڑکیوں کے حقوق کے تحفظ کے لیے مختلف پروگرامز اور سرگرمیاں منعقد کرتی ہیں۔ اس دن کی تقریبات میں سیمینارز، آگاہی مہمات، ورکشاپس اور مختلف پروگرام شامل ہوتے ہیں جن کا مقصد لڑکیوں کو ان کے حقوق کے بارے میں آگاہی دینا اور ان میں خود اعتمادی پیدا کرنا ہوتا ہے۔
اقوام متحدہ کی جنرل اسمبلی کے مطابق اس دن کا مقصد لڑکیوں کو تعلیم، صحت اور صنفی مساوات کے حوالے سے مواقع فراہم کرنا ہے تاکہ وہ ایک روشن اور محفوظ مستقبل کی جانب قدم بڑھا سکیں۔
