کراچی:معروف اسلامی اسکالر اور عالمی مبلغ ڈاکٹر ذاکر نائیک کو جامعہ کراچی کی جانب سے ڈاکٹریٹ کی اعزازی سند عطا کی گئی ہے۔
گورنر ہاؤس میں کراچی یونیورسٹی کی تقریب منعقد ہوئی، جس میں جامعہ کے چانسلر اور گورنر سندھ کامران ٹیسوری نے ڈاکٹر ذاکر نائیک کو پی ایچ ڈی کی اعزازی ڈگری دی۔ اس موقع پر خطاب کرتے ہوئے گورنر سندھ و چانسلر جامعہ کراچی کامران ٹیسوری نے کہا کہ ڈاکٹر ذاکر نائیک کو ان کی خدمات پر اعزازی ڈگری دی گئی، انہیں ڈاکٹریٹ کی اعزازی ڈگری ملنے پر مبارکباد پیش کرتا ہوں۔
انہوں نے کہا کہ ڈاکٹر ذاکر نائیک مسلم دنیا میں بے حد مقبول ہیں، انہوں نے دنیا بھر میں ہزاروں لیکچرز دیےاورکئی مناظرے ریکارڈ کرائے، مجھے یقین ہے کہ ڈاکٹر ذاکر نائیک اسی طرح اپنی خدمات کو جاری رکھیں گے۔
تقریب میں مختلف ممالک کے قونصل جنرلز، سندھ ہائر ایجوکیشن کمیشن کے چیئرمین پروفیسر ڈاکٹر طارق رفیع، شیخ الجامعہ کراچی پروفیسر خالد عراقی، مفتی عبد الرحیم ،ڈینز، پروفیسرز اور اساتذہ کرام کی بڑی تعداد شریک تھی۔
