ایران نے اسرائیل کی جانب سے ممکنہ حملے یا عسکری کارروائی کے حوالے سے وضاحت دی ہے کہ کسی بھی حملے کا جواب غیر روایتی طریقے سے دیا جائے گا۔
بین الاقوامی خبر رساں اداروں کے مطابق ایران کے حوالے سے اہم پیش رفت میں ایرانی ذرائع نے الجزیرہ کو بتایا کہ ایران نے قطر کے ذریعے امریکہ کو پیغام بھیجا کہ وہ خطے میں جنگ نہیں چاہتا تاہم ایران نے یہ بھی واضح کیا کہ یکطرفہ خود پر پابندی کا دور ختم ہو گیا ہے اور خبردار کیا کہ کسی بھی اسرائیلی حملے کا جواب غیر روایتی طریقے سے دیا جائے گا۔
حزب اللہ نے دعویٰ کیا ہے کہ اس نے جنوبی لبنان کے گاؤں مارون الراس میں اسرائیلی فوجیوں کے خلاف بم دھماکہ کیا جب اسرائیلی افواج نے علاقے میں داخل ہونے کی کوشش کی۔
اس واقعے کے بعد اسرائیل نے لبنان کے دارالحکومت بیروت پر فضائی حملے شروع کر دیے ہیں۔ لبنانی فوج کے مطابق ان حملوں میں جنوبی لبنان میں دو فوجی ہلاک ہوئے۔
اسرائیلی فضائی حملوں کے دوران وسطی بیروت کو بھی نشانہ بنایا گیا، جس کے نتیجے میں کم از کم 9 افراد ہلاک اور 14 زخمی ہو گئے۔ اس کے علاوہ، بیروت کے جنوبی مضافاتی علاقے دحیہ پر تین میزائل بھی گرے، جنہوں نے مزید نقصان پہنچایا۔
دوسری جانب غزہ کی صورتحال مزید بگڑ گئی ہے، جہاں اسرائیل نے اپنے حملے تیز کر دیے ہیں۔ گزشتہ 48 گھنٹوں میں درجنوں فلسطینیوں کی ہلاکت کی خبریں موصول ہوئی ہیں۔ اکتوبر 2023 سے اب تک غزہ میں اسرائیلی حملوں کے نتیجے میں 41,788 افراد ہلاک اور 96,794 زخمی ہو چکے ہیں۔ اسرائیل میں 7 اکتوبر کو حماس کے زیر قیادت حملوں میں کم از کم 1,139 افراد ہلاک اور 200 سے زائد یرغمال بنا لیے گئے تھے۔
