لاہور: پاکستان کرکٹ بورڈ (پی سی بی) نے تصدیق کی ہے کہ بابر اعظم نے پاکستان مینز وائٹ بال کپتان کی حیثیت سے استعفیٰ دے دیا ہے جسکو قبول کر لیا گیا ہے ۔
قومی انتخابی کمیٹی کو آئندہ وائٹ بال کرکٹ کی حکمت عملی وضع کرنے کے عمل کا آغاز کرنے کی ذمہ داری سونپی گئی ہے، جس میں نئے کپتان کی سفارش بھی شامل ہے ۔
اگرچہ پی سی بی نے بابر اعظم کی وائٹ بال کپتانی کی حمایت کی، لیکن ان کے مستعفی ہونے کا فیصلہ اس بات کی عکاسی کرتا ہے کہ وہ بطور کھلاڑی زیادہ اثر ڈالنے کی خواہش رکھتے ہیں ۔
یہ فیصلہ ان کی پیشہ ورانہ مہارت اور پاکستان کرکٹ کے لیے ان کے عزم کا ثبوت ہے۔ وہ سمجھتے ہیں کہ اپنے بیٹنگ پر مکمل توجہ دینے سے وہ ٹیم کی کامیابی میں زیادہ فیصلہ کن کردار ادا کر سکیں گے۔
پاکستان کرکٹ بورڈ بابراعظم کی وائٹ بال کپتانی میں شراکتوں، ٹیم کی ضروریات کو ترجیح دینے کی صلاحیت اور پاکستان کرکٹ کے لیے ان کی غیر متزلزل وابستگی کو تسلیم کرتا ہے ۔ پی سی بی بابر اعظم کی حمایت جاری رکھے گا، کیونکہ وہ اب بھی ایک عالمی معیار کے بلے باز اور ٹیم کے سینئر رکن کے طور پر بہت کچھ پیش کرنے کی صلاحیت رکھتے ہیں۔
بابر اعظم نے کہا پاکستان کے لیے کھیلنا ہمیشہ میرے لیے سب سے بڑا اعزاز رہا ہے اور میں نے ہمیشہ ٹیم کی کامیابی کو سب چیزوں پر مقدم رکھا ہے۔ کپتانی چھوڑنے سے مجھے بطور کھلاڑی مزید کارکردگی دینے میں مدد ملے گی اور میں اس راہ پر مکمل طور پر عزم ہوں ۔ میرے نزدیک ٹیم کی کامیابی سب سے زیادہ اہم ہے۔
انہوں نے کہا کہ مجھے پاکستان کی قیادت کرنے کا موقع ملا ہے، اور میں نے ہمیشہ کپتان اور کھلاڑی دونوں کی حیثیت سے اپنی پرفارمنس کو بہترین دینے کی کوشش کی ہے۔ مضبوطی سے یقین رکھتا ہوں کہ میں اپنی بیٹنگ پر توجہ مرکوز کر کے بڑا اثر ڈال سکتا ہوں۔ میں اپنے ساتھیوں، کوچز اور پی سی بی کی جانب سے مسلسل حمایت کے لیے شکر گزار ہوں ۔
ان کا کہنا تھا کہ پاکستان کی قیادت کرنا ایک عظیم اعزاز رہا ہے، اب صحیح وقت ہے کہ میں اپنی مکمل توجہ بیٹنگ اور ٹیم کے مقاصد پر مرکوز کروں، اس عبوری مرحلے کے دوران نئے کپتان اور ابھرتے ہوئے کھلاڑیوں کی حمایت کروں، کیونکہ ہم آئندہ اہم سیزن کے لیے تیاری کر رہے ہیں، جس میں اگلے سال اپنے وطن میں آئی سی سی چیمپئنز ٹرافی کا دفاع بھی شامل ہے ۔
