واٹس ایپ اور کلاؤڈ فیئر نے انکرپٹڈ چیٹس کی سیکیورٹی کو مزید مضبوط بنانے کے لیے اہم شراکت داری کی ہے، جس کے تحت کلید شفافیت (Key Transparency) کے نظام کو بہتر کیا جائے گا۔
کلاؤڈ فیئر نے نئی سروس “Plexi” متعارف کرائی ہے، جو انکرپشن کلیدوں کی تصدیق اور انکرپٹڈ پیغامات کی حفاظت کو یقینی بنائے گی۔ یہ نظام اس بات کو یقینی بناتا ہے کہ انکرپٹڈ پیغام رسانی میں استعمال ہونے والی کلیدیں درست اور محفوظ ہیں، جو خاص طور پر صحافیوں اور انسانی حقوق کے کارکنوں جیسے حساس افراد کے لیے ضروری ہے۔
کلاؤڈ فیئر کے سی ای او میتھیو پرنس کا کہنا ہے کہ وہ پہلے ہی سے خطرے میں گھرے افراد کی آن لائن سیکیورٹی کو یقینی بناتے ہیں اور اب واٹس ایپ کے ساتھ اس اشتراک سے انکرپٹڈ پیغام رسانی کی ایپس کے لیے بیرونی آڈٹ فراہم کرنا اسی مقصد کا حصہ ہے۔
“Plexi” کا نفاذ واٹس ایپ کے انکرپشن سسٹم میں ایک اور حفاظتی تہہ شامل کرے گا، جس سے حملہ آوروں کے لیے سسٹم میں خامیاں نکالنا اور اسے کمزور کرنا مزید مشکل ہو جائے گا۔ اس سے صارفین کو یقین ہوگا کہ ان کے پیغامات ایک شفاف اور محفوظ نظام کے تحت محفوظ ہیں۔
واٹس ایپ کے ہیڈ آف انجینئرنگ نیتن گپتا نے کہا کہ کلاؤڈ فیئر کے ساتھ اس اشتراک کا مقصد صارفین کو یہ یقین دلانا ہے کہ ان کا انکرپٹڈ سیشن مکمل طور پر محفوظ ہے۔
“Plexi” اور اس کے خودکار کلید تصدیقی نظام سے اب صارفین کو دستی طور پر کلیدوں کی تصدیق کرنے کی ضرورت نہیں ہوگی۔ یہ عمل پس پردہ خودکار طور پر ہوگا، جس سے انکرپشن کا عمل مزید آسان اور صارف دوست بن جائے گا۔
یہ پیشرفت اس وقت سامنے آئی ہے جب ڈیجیٹل مواصلات میں سیکیورٹی اور پرائیویسی کے خدشات میں اضافہ ہو رہا ہے۔ واٹس ایپ، جس کے دو ارب سے زائد صارفین ہیں، سائبر حملوں کے لیے ایک نمایاں ہدف ہے۔
کلاؤڈ فیئر کے ساتھ اس شراکت داری کے ذریعے واٹس ایپ نے اپنے انکرپشن سسٹم کو مزید محفوظ بنا لیا ہے، تاکہ صارفین کا ڈیٹا محفوظ رہے اور غیر مجاز رسائی سے بچا جا سکے۔
